„Þetta verður skemmtiknattspyrnuþáttur“

Gummi Ben stýrir nýjum þáttum um Pepsi Max-deild karla í fótbolta í allt sumar og í kvöld verður hitað vel upp fyrir 1. umferð deildarinnar í opinni dagskrá á Vísi og Stöð 2 Sport.

Pepsi Max stúkan er uppgjörsþáttur sem sýndur verður á Stöð 2 Sport eftir hverja umferð og verður ýmist strax eftir að síðasta leik í umferð lýkur eða þá daginn eftir, ef að mjög margir leikir eru lokadag umferðar.

„Við ætlum fyrst og fremst að hafa gaman og reyna að skemmta áhorfendum, en við ætlum líka að vera fræðandi. Þetta verður skemmtiknattspyrnuþáttur,“ segir Gummi og tekur undir að þátturinn verði ólíkur Pepsi Max mörkunum að einhverju leyti:

„Ég held að það sé óhjákvæmilegt. Þegar nýir menn stjórna þá verða breytingar, og það eru nýir sérfræðingar. Við ætlum frekar að reyna að stytta þættina ef það er mögulegt, en það er reyndar ekki auðvelt. Sama hversu oft maður ákveður að vera bara í 60 mínútur þá teygist einhvern veginn á þessu því okkur finnst öllum mjög gaman að tala um fótbolta, og bara að tala yfir höfuð,“ segir Gummi léttur.

Auk Pepsi Max stúkunnar er svo nýr þáttur í umsjón Kjartans Atla Kjartanssonar á dagskrá í sumar, Pepsi Max tilþrifin, þar sem sýnd verða öll mörk og helstu tilþrif í leikjum deildarinnar.

„Eins og til að mynda núna, í fyrstu umferðinni, þegar þrír leikir verða á sunnudaginn, þá verður Kjartan Atli með þátt strax eftir að síðasta leik lýkur. Hann gerir upp leikina með sérfræðingi, sýnir mörkin og tilþrifin. Síðan förum við yfir umferðina í heild sinni í Pepsi Max stúkunni daginn eftir,“ segir Gummi.

Fyrrnefndur upphitunarþáttur hefst kl. 21.15 í kvöld.