Textílfélagið opnaði í gær sýninguna Nýju fötin keisarans á Kolagötu á Hafnartorgi. Félagið hefur tekið þátt í HönnunarMars frá upphafi og er þetta framlag þeirra í ár. Á sýningunni er lögð áhersla á að tengja saman fornar og nýjar aðferðir og varðveita þannig menningararf þjóðarinnar auk þess að kanna í hvaða nýjar áttir textíliðnaðurinn getur farið.
„Þetta er sannkölluð textíl veisla sem sýnir þverskurð og fjölbreytta textíl-þekkingu og vinnu félagskvenna. Mikið er lagt upp úr endurnýtingu og sjálfbærni og er skemmtilegt að sjá hvernig hið forna sameinast hinu nýja og varðveita þannig menningararf þjóðarinnar ásamt því́ að færa textíliðnaðinn inn í framtíðina og opna fyrir nýja möguleika,“ segir Rakel Blomsterberg úr sýningarnefndinni í samtali við Vísi. Hún sýnir einnig sjálf á hátíðinni.
„Ég er að blanda saman hefðbundum útsaumsaðferðum, ólíkum efnum og stafrænu prenti og er með því að skoða hvernig hægt er að þinna verkið og vinnuna út.“
Sýningin Nýju fötin keisarans opnar fyrir samtal textílhönnuða og textíllistamanna þar sem áhorfandinn fær tækifæri og innsýn í vinnuferli og þekkingu þeirra. Með þessari sýningu vill félagið sýna þann fjölbreytileika og þá textílþekkingu sem félagsmenn búa að og vilja miðla til komandi kynslóða.
Sýningin er opin frá klukkan 11:00 til 19:00 á meðan HönnunarMars stendur og er aðgangur ókeypis. Hátíðinni lýkur á sunnudag. Sýningarnefndin er skipuð þeim Rakel Blomsterberg, Brynhildi Þórðardóttur, Kristveigu Halldórsdóttur og Sigríði Ólafsdóttur. Í Textílfélaginu eru 100 félagsmenn og í sýningunni í ár taka 25 þátt með ólík og áhugaverð verk. Nánar má lesa um sýninguna á vefsíðu Textílfélagsins.
Þær sem taka þátt eru Anna Guðmundsdóttir, Arnþrúður Ösp Karlsdóttir, Ásdís Birgisdóttir, Bryndís Björgvinsdóttir, Brynhildur Þórðardóttir, Guðlaug Halldórsdóttir, Guðrún Kolbeins Jónsdóttir, Helene Magnusson, Helga Mogensen, Helga Pálína Brynjólfsdóttir, Herdís Tómasdóttir, Hrafnhildur Sigurðardóttir, Inga Björk Andrésdóttir, Íris Ólöf Sigurjónsdóttir, Jóna Imsland, Kristveig Halldórsdóttir, Maja Siska, Margrét Guðnadóttir, María Valsdóttir, Olga Bergljót Þorleifsdóttir, Päivi Vaarula, Rakel Blom, Sigríður Ólafsdóttir, Þorbjörg Þórðardóttir og Þorgerður Hlöðversdóttir.
Fréttamaður Stöðvar 2 kíkti á HönnunarMars í gær og leit við á sýningunni Nýju fötin keisarans. Hægt er að horfa á innslagið í spilaranum hér fyrir neðan.
HönnunarMars 2020 átti að fara fram í lok marsmánaðar eins og undanfarin ellefu ár, en vegna Covid-19 faraldursins var hátíðinni frestað til 24.-28. júní. Á hátíðinni leiðir framsækin hönnun og nýjungar saman sýnendur og gesti.
HönnunarMars fer fram með breyttu sniði í ár en tugir hönnuða taka þátt og allir ættu að geta fundið eitthvað við sitt hæfi. Nánar verður fjallað um hátíðina hér á Vísi næstu daga. Einhverjir viðburðir eru opnir lengur en þessa fimm daga og nánar má lesa um dagskránna á vef HönnunarMars.
