Sam­komu­bann miðast við þúsund eftir verslunar­manna­helgi

Svandís Svavarsdóttir heilbrigðisráðherra hefur samþykkt tillögur Þórólfs Guðnasonar sóttvarnalæknis að framlengja núgildandi samkomubann fram yfir verslunarmannahelgi. Því munu fjöldatakmörk áfram miðast við 500 manns en hækka í þúsund þann 4. ágúst næstkomandi.

Þetta kemur fram á vef Stjórnarráðsins en Þórólfur greindi frá minnisblaðinu á upplýsingafundi í gær. 

Með rýmkun samkomubanns verður opnunartími skemmti- og vínveitingastaða lengdur til miðnættis. Í minnisblaði sóttvarnalæknis segir að þetta sé tímabært í ljósi þess að opnun landamæra hefur ekki leitt til aukningar á innanlandssmitum og að skimanir séu komnar í gott horf.

Á upplýsingafundi í gær sagði Þórólfur að nú þyrfti að breyta viðbrögðum við kórónuveirufaraldrinum úr neyðarstjórnun í daglegt verkefni. Ljóst væri að heimsbyggðin þyrfti að lifa með honum næstu mánuðina eða jafnvel árin.

Í minnisblaðinu kemur fram að rúmlega 50 þúsund ferðamenn hafi komið hingað til lands eftir að skimanir hófust þann 15. júní og um 30 þúsund sýni hafi verið tekin. Aðeins fjórtán virk smit hafi fundist og ellefu innanlandssmit greinst í kjölfarið. Engin önnur innanlandssmit hafi greinst.

Framlenging á núverandi auglýsingu verður birt á næstu dögum í stjórnartíðindum ásamt nýrri auglýsingu með breyttum reglum sem taka gildi þann 4. ágúst.