Jaguar Land Rover hannaði snertilausan snertiskjá

Jaguar Land Rover hefur hafið prófanir á snertilausum snertiskjá, snertiskjá sem notar gervigreind til að lesa úr skynjurum til að ákveða hvaða hluta af skjánum notandinn er að benda á. Á íslensku útleggst svona skjár sennilegast sem bendiskjár.

Bendi-tæknin er þróuð í samstarfi við Cambridge háskólann. Jaguar Land Rover vonar að tæknin muni „gera bíla öruggari með því að draga úr áreiti á skynjunarvit ökumanna og auka tímann sem ökumenn geta einbeitt sér að veginum fyrir framan sig“. Prófanir sýna að kerfið dragi úr tíma sem fer í notkun snertiskjáa um 50%.

Markmiðið er að kerfið viti á hvað þú ert að benda um leið og þú hreyfir hönd í átt að skjánum. Hreyfiskynjarar eru notaðir ásamt útvarpsbylgju skynjurum, þær upplýsingar ásamt samhengi þess sem er á skjánum og er í gangi hverju sinni ásamt prófíl hvers ökumanns er notað til að reyna að giska á hvað ökumaður vill gera.

Óvíst er hvort og þá hvenær Jaguar Land Rover setur búnaðinn í bíl frá sér. Hugbúnaðurinn er að sögn Jaguar Land Rover næstum klár og gæti verið settur í bíla sem nú þegar eru í umferð, en það er auðvitað háð því að réttir skynjarar séu til staðar í þeim bílum.