Reyndi að ræna gangandi vegfaranda í miðbænum

Maður var handtekinn í miðbænum í nótt eftir að hann ógnaði gangandi vegfarenda og reyndi að ná peningum af honum. Lögreglan stöðvaði einnig framleiðslu fíkniefna í Árbæ þar sem tveir voru handteknir vegna málsins. Þá stöðvaði lögreglan ökumann mótorhjóls í Hlíðunum þar sem ökumaður þess var á 146 km hraða þar sem hámarkshraði er 60 km/klst. Þar að auki hafði hann áður verið sviptur ökuréttindum.

Lögreglan á höfuðborgarsvæðinu hafði í nógu að snúast í nótt og voru rúmlega 80 mál skráð í dagbók lögreglu frá fimm í gær til fimm í morgun, samkvæmt dagbók lögreglu. Þá var sérlega mikið um hávaðatilkynningar vegna samkvæma.

Aðfaranótt laugardags bárust tilkynningar um ellefu hávaðasöm samkvæmi og þótti það mikið í dagbók lögreglu í gær. Í nótt rötuðu hins vegar 22 hávaðamál á borð lögreglu. Sex voru vistaðir í fangaklefa í nótt. Í Árbænum var lögregla kölluð til í nótt þegar aðilar skutu flugeldum á loft. Þeir voru þó búnir að forða sér þegar lögregluþjóna bar að garði.

Þá voru níu ökumenn stöðvaður fyrir ölvunar og eða fíkniefnaakstur.

Fjórir voru handteknir vegna slagsmála í miðbænum í nótt en einn þeirra var vistaður í fangaklefa. Þá voru tveir fluttir á bráðamóttöku eftir að þeir féllu á andlitið, annar í miðbænum og hinn í Vesturbænum. Einn var fluttur á slysadeild eftir að hann slasaðist við að stökkva á trampólíni í Kópavogi.

Auk þess stöðvuðu lögregluþjónar ökumann sem dró hjólhýsi á Kjalarnesi í gær. Hjólabúnaður hjólhýsisins var, samkvæmt dagbók lögreglu, í „mjög slæmu ástandi“ og var það kyrrsett.