Skildu svínshöfuð eftir fyrir utan æfingasvæðið í mótmælaskyni

Stuðningsmenn SPAL voru afar ósáttir með að liðið hafi fallið úr ítölsku úrvalsdeildinni og sýndu óánægju sína í verki með fremur ógeðfelldum hætti.

Þeir skildu nefnilega afsagað svínshöfuð eftir fyrir utan æfingasvæði SPAL. Meðfylgjandi var borði með orðunum „Hypjið ykkur, svínin frá Ferrara“. SPAL er í borginni Ferrara á Norður-Ítalíu.

Forseti SPAL, Valentina Ferozzi, fordæmdi athæfi stuðningsmannanna. „Fólki er frjálst að mótmæla en það er hægt að fara aðrar leiðir. Ég veit ekki hver gerði þetta en að nota afsagað svínshöfuð er smekklaust og endurspeglar ekki stuðningsmannahóp okkar, sem á betra skilið en þetta,“ sagði hún.

Þetta er ekki í fyrsta sinn sem svínshöfuð er notað í mótmælaskyni í fótbolta. Frægt er þegar stuðningsmaður Barcelona kastaði svínshöfði í átt að Luis Figo, leikmanni Real Madrid, þegar hann var að taka hornspyrnu í leik liðanna, El Clásico, á Nývangi í nóvember 2002. Tveimur árum áður hafði Figo gengið í raðir Real Madrid frá Barcelona stuðningsmönnum Börsunga til lítillar ánægju.

Ljóst var að SPAL myndi falla eftir 2-1 tap fyrir Birki Bjarnasyni og félögum í Brescia 19. júlí. Tímabilið hefur verið ein samfelld sorgarsaga hjá SPAL og liðið hefur aðeins unnið fimm af 37 leikjum sínum í ítölsku úrvalsdeildinni. Í lokaumferðinni á sunnudaginn tekur SPAL á móti Fiorentina.

Uppgangur SPAL var eftirtektarverður en liðið fór upp um tvær deildir á jafn mörgum árum og og endaði í 13. sæti ítölsku úrvalsdeildarinnar á síðasta tímabili. SPAL vann þá m.a. 2-1 sigur á meisturum Juventus. Nú er ævintýrinu hins vegar lokið, allavega í bili.