Pepsi Max stúkan: Tveggja metra reglan í hávegum höfð í varnarleik Skagamanna

Spekingar Pepsi Max stúkunnar hafa ekki verið hrifnir af varnarleik Skagamanna í sumar og segja að þeir hafi verið full djarfir að nota tveggja metra regluna í sumar.

Skagamenn, ásamt hinum liðunum fimm, sem sitja í sætum sjö til tólf í Pepsi Max-deild karla voru til umræðu í Pepsi Max stúkunni á mánudagskvöldið.

Þar sagði Atli Viðar að ef einhver þjálfari hefði verið sáttur við að deildin hafi verið sett á smá pásu, hafi það verið Jóhannes Karl Guðjónsson, þjálfari ÍA, en gengi ÍA fyrir pásuna var ekki merkilegt.

„Ef einhver þjálfari var sáttur með þessa pásu, þá var Jói [Jóhannes Karl] því mér fannst þeir vera komnir í pínu vesen. Það stóð ekki steinn yfir steini í að minnsta kosti tveimur af þremur síðustu leikjunum fyrir pásu svo þeir þurftu tíma til að stilla sig pínulítið af,“ sagði Atli Viðar.

„Maður þarf að nota tímann. Það er ekki bara nóg að fá tíma. Það þarf að nota hann vel. Hvernig það má æfa, hef ég ekki alveg fengið útskýringar á. Það er misjafnt eftir við hvern þú talar,“ sagði Tómas Ingi.

„Þeir hafa notað tveggja metra regluna í varnarleik sínum í sumar mjög vel,“ bætti Tómas Ingi við.

Allir voru þeir sammála um að varnarleikur liðsins væri þeirra helsti Akkilesarhæll. Ekki bara öftustu menn heldur hvernig allt liðið verst.

„Stóra vandamálið er varnarleikur liðsins. Það er alveg ljóst. Þeir eru að skora fullt af mörkum og eru skemmtilega spennandi fram á við en þeir eru að leka mörkum og varnarleikurinn er barnalegur oft á tíðum. Lélegur og barnalegur.“

„Bakverðirnir hafa verið í vandræðum. Liðin sækja aftur fyrir bakverðina og coverið sem þeir fá er mjög lélegt. Það breytir því ekki að þeir eru lélegir að leysa maður gegn manni stöður. Það er bara staðan. Liðið er bara lélegt varnarlið.“