Leikurinn við Ungverja mikilvægari en við Dani

Hvernig við komumst á Ólympíuleikana. Það er saga að segja frá. Hvernig valið er inn í handboltakeppni Ólympíuleikanna er svolítið flókið, segir Gunnar Smári Egilsson blaðamaður en hann er sérfræðingur í að rýna í ýmis kerfi og stærðfræðiformúlur. Hann veltir þessu fyrir sér í pistli sem hann birti á Facebook og gaf Vísi góðfúslegt leyfi til að birta.

Í athugasemdakerfi er fullyrt að ekki séu nema þrír núlifandi Íslendingar sem þekkja þessar reglur til hlítar. Sem hlýtur að teljast nærri lagi. Hér er farið yfir það hvað þarf að gerast til að við komumst á Ólympíuleikana, upplagt til að brjóta heila um áður en leikurinn við Ungverja hefst. En, jafnframt er vert að vara við, þetta er flókið. En, gefum Gunnari Smára orðið:

Tvö sæti laus

„Eins og ég skil þetta fara nokkur lið beint: Gestgjafar Japana, heimsmeistarar Dana og svo álfumeistara; Bahrain frá Asíu, Argentína frá Ameríku og svo sigurvegarar Evrópumótsins og Afríkumótsins, sem byrjar á morgun. Þetta eru sex lið, þar af fjögur klár: Japan, Danmörk, Bahrain og Argentína. Tvo sæti laus. Ef Ísland ætlar að fara þessa leið verður það að verða Evrópumeistari eða tapa fyrir Dönum í úrslitaleik.

Við þetta bætast síðan sex lið úr umspilsmóti sem háð verður í apríl. Þangað fara tólf lið og hafa átta þegar unnið sér rétt vegna frammistöðu á heimsmeistaramóti eða álfukeppni: Noregur, Frakkland, Þýskaland, Svíþjóð, Króatía og Spánn komust frá HM og Chile og Suður-Kórea frá álfukeppnum. Út af standa tvö sæti úr Afríkukeppninni og tvo frá Evrópukeppninni.

Áttunda sæti miði með fyrirvörum þó

Til að komast í þetta umspil má Ísland ekki missa meira en eitt lið, sem ekki hefur unnið sér sæti í umspilinu eða beint á Ólympíuleikana, upp fyrir sig.

Þá er að skoða hvaða lið eru komin í milliriðla, sem hafa unnið sér þátttökurétt í umspilskeppninni. Í öðrum riðlinum eru Króatía, Spánn og Þýskalands með umspilsrétt en Austurríki, Tékkland og Hvíta-Rússland ekki. Í hinum er Noregur og Svíþjóð með rétt og svo Danir ef Íslendingar vinna Ungverja. Án umspilsréttar eru Slóvenar, Íslendingar, Portúgalar og Ungverjar, ef þeir vinna Íslendinga á eftir.

Ísland kæmist áfram ef það yrði í áttunda sæti á Evrópumótinu, að því gefnu að Króatía, Spánn, Þýskaland, Noregur, Svíþjóð og Danmörk yrðu öll fyrir ofan okkur. Við kæmust ekki í umspil þótt við lentum í þriðja sæti, ef ekkert af þessum liðum færi í úrslitaleikinn.

Þetta er því allt mjög afstætt, það er frekar staða Íslands gagnvart þessum liðum sem ræður en hvaða sæti Íslandi endar í. Eina leiðin til að vera viss er að komast í úrslitaleikinn á Evrópumótinu.

Vont að Frakkar skyldu detta út

En á þessu stigi er betra fyrir Ísland að hafa sem flestar þjóðir með sem hafa unnið sér rétt til umspils eða þátttöku á Ólympíuleikunum. Það var í raun vont fyrir okkur að Frakkar skyldu detta út og það væri vont ef Danir féllu líka úr keppni. Við erum nefnilega innan keppninnar í annarri keppni við þau liða sem ekki hafa unnið sér sæti í umspilinu. Sú keppni gengur út á að vera nr. 1 eða 2 meðal þessara þjóða (megum bara missa eitt af hinum liðunum upp fyrir okkur):

Austurríki

Hvíta-Rússland

Ísland

Portúgal

Slóvenía

Tékkland

Ungverjaland (ef við töpum á eftir)

Keppni innan keppninnar

Leikurinn á eftir er hluti af þessari keppni innan keppninnar. En svo er hann líka í raun fyrsti leikur Íslands í milliriðlum, því ef Ísland vinnur tekur það 2 stig með sér inn í milliriðil en ef Ísland tapar fer það stigalaust í milliriðil. Ef það verður jafnt fer það með eitt stig, eins og Ungverjar.

Við höfum því nokkurn hag af því að Danir fari áfram en enn meiri hag af því að Ungverjar fari ekki áfram, til að losna við þá og til að taka með 2 stig yfir í milliriðil.

Í milliriðli mætum við Norðmönnum, Svíum, Portúgölum og Slóvenum og þurfum líklega að vinna þrjá af þessum leikjum til að komast í undanúrslit, mögulega sleppum við með tvo sigra og eitt jafntefli ef hin liðin tæta stig hvert af öðru. Það er vel mögulegt. Alveg eins og það er vel mögulegt að það takist ekki.“

Svo mörg voru þau orð og ágætt að velta fyrir sér möguleikum nú þegar klukkutími í leik, takk fyrir. Áfram Ísland.