Sóttu veikan sjómann á grænlenskan togara

Áhöfnin á TF-GRO, þyrlu Landhelgisgæslunnar, sótti veikan sjómann um borð í grænlenskan togara í dag.

Útkallið kom á tíunda tímanum í morgun en togarinn var staddur rúmlega 150 sjómílur vestur af Látrabjargi, rétt utan miðlínu Íslands og Grænlands. Barst Gæslunni beiðni um aðstoð frá björgunarstjórnstöðinni í Danmörku.

Í tilkynningu Landhelgisgæslunnar segir að grænlenski togarinn hafi tekið stefnuna til Íslands en slæmt veður hafi verið á þeim slóðum þar sem skipið var statt.

„TF-GRO tók á loft frá Reykjavíkurflugvelli laust eftir klukkan 10 en jafnframt var áhöfnin á TF-EIR til taks á Reykjavíkurflugvelli ef á þyrfti að halda. Eftir rúmlega hálftíma flug lenti þyrlan á Rifi til að fylla á eldsneytistankana áður en haldið var í átt að skipinu.

Þyrlan var komin að grænlenska togaranum á tólfa tímanum og hófst áhöfnin þegar handa við að undirbúa hífingar. Sigmaður Landhelgisgæslunnar fór um borð í skipið og undirbjó sjúklinginn til flutnings.

Þrátt fyrir nokkuð krefjandi aðstæður gengu hífingar vel og að þeim loknum var haldið rakleiðis á Reykjavíkurflugvöll. Þar lenti TF-GRO klukkan 13:42 og í kjölfarið var skipverjinn fluttur þaðan með sjúkrabíl á Landspítalann,“ segir í tilkynningu Gæslunnar.