Pamela Anderson skilin eftir aðeins 12 daga hjónaband sem var ekki alvöru hjónaband

Ofurfyrirsætan og leikkonan Pamela Anderson og kvikmyndaframleiðandinn Jon Peters hafa ákveðið að slíta samvistum, aðeins 12 dögum eftir að þau játuðust hvort öðru við hátíðlega athöfn í Mailbu í Kaliforníu í Bandaríkjunum.

Að því er fram kemur í frétt TMZ af skilnaði þeirra Anderson og Peters virðast þau þó aldrei formlega hafa skilað inn tilskildum pappírum til þess að geta talist skráð í hjúskap.

TMZ hefur eftir Pamelu: „Ég er hrærð yfir hlýlegum viðbrögðum við sambandi mínu og Jons. Við yrðum afar þakklát fyrir stuðning ykkar á meðan við tökum okkur tíma og endurmetum hvað við viljum í lífinu, og hvort frá öðru. Lífið er ferðalag og ástin er ferli.“

„Með þann algilda sannleik í huga höfum við ákveðið að fresta fullgildingu hjónabandsins og setja trú okkar á ferlið. Takk fyrir að virða friðhelgi okkar.“

Þegar tilkynnt var um væntanlegt hjónaband þeirra Anderson og Peters var haft eftir kvikmyndaframleiðandanum að hann væri enn bálskotinn í Pamelu, en þau áttu í sambandi fyrir um þrjátíu árum. Hún sagði sömuleiðis að Peters væri einn af upprunalegu „vondu strákunum“ (e. bad boys) í Hollywood, og að hún elskaði hann.

Hefði hjónaband þeirra Anderson og Peters formlega gengið í gegn hefði það verið fimmta hjónaband hvors þeirra.