Þóttust þurfa að bjarga fé úr Heimakletti í miðju eldgosi

„Ég sagði nú einhversstaðar í viðtali að ég hefði logið mig til Eyja, ásamt fleirum,“ segir Adólf Sigurgeirsson járnsmiður, einn af Eyjamönnunum sem settust að í Grindavík eftir gos, í upprifjun í þættinum Um land allt á Stöð 2. 

Margir Eyjamanna áttu erfitt með að sætta sig við takmarkanir sem yfirvöld settu á ferðir til Vestmannaeyja eftir að eldgosið hófst þann 23. janúar 1973. Þegar Adólf og félögum var synjað um fararleyfi datt þeim ráð í hug til að snúa á Almannavarnir.

„Að láta vita af því að við þurfum að fara upp í Heimaklett og bjarga fénu sem er uppi í Heimakletti. Það sé ekki hægt að hafa það þar í þessu öskufalli og þessum ósköpum. Það þurfi að ná fénu ofan af Heimakletti,“ segir Adólf. 

Eftir stuttan fund í kjallara lögreglustöðvarinnar í Reykjavík komu ráðamenn Almannavarna fram með lausnina. Þyrla frá hernum skyldi fengin til að skjóta féð. 

„Okkur fannst það nú lítil björgun.“ Og á endanum fengu Adólf og félagar leyfi en aðeins til að stoppa í tvær klukkustundir á Heimaey til að sækja féð.

„En í lok sögunnar, þá hefur aldrei verið fé í Heimakletti á veturnar. Og eins og þú veist kannski, ef þú hefur komið til Eyja; það tekur meira en klukkutíma að fara upp í Heimaklett og aftur til baka. Hvað þá að smala fénu þar,“ segir Adólf og hlær en framhald sögunnar má heyra í spilaranum hér fyrir neðan. 

Þátturinn verður endursýndur á Stöð 2 í dag, laugardag, klukkan 15.45. 

Fleiri sögur af Eyjamönnum og eldgosinu má sjá hér fyrir neðan, þar á meðal fjóra þætti sem Stöð 2 gerði árið 2013 í tilefni 40 ára afmælis gossins: