Einn fluttur á slysa­deild eftir líkams­á­rás

Lögreglu bárust tilkynningar um þrjár líkamsárásir í nótt. Í öllum tilfellum voru árásarmenn handteknir, að því er fram kemur í dagbók lögreglunnar á höfuðborgarsvæðinu. Fæst meiðslanna sem hlutust af árásunum voru alvarleg, að sögn lögreglu. Þó þurfti að flytja einn á slysadeild.

Fimm voru þá handtekin fyrir akstur undir áhrifum áfengis eða vímuefna. Lögregla fékk fjórar tilkynningar um þjófnað, tvær vegna búðarhnupls og tvær vegna innbrota.

Tíu tilkynningar bárust vegna hávaðasamra samkvæmisgesta og ónæðis frá ölvuðu fólki.

Alls voru rúmlega hundrað mál voru skráð hjá lögreglunni á höfuðborgarsvæðinu frá klukkan 17 í gær til 5 í nótt og átta voru vistaðir í fangageymslu á tímabilinu.