Valgeir lánaður til Brentford

Valgeir Valgeirsson hefur verið lánaður frá HK til Brentford í ensku B-deildina.

Valgeir hefur verið á radaranum hjá erlendum liðum en m.a. AaB í Danmörku hefur verið á eftir Valgeiri.

Guðmundur Benediktsson greinir frá tíðindunum á Twitter-síðu sinni og segir að Valgeir hafi leikið sinn síðasta leik fyrir HK í bili.

Brentford komst í umspilið um laust sæti í úrvalsdeildinni á síðustu leiktíð en liðið hefur náð í fjögur stig í fyrstu fjórum leikjunum í ár.

Liðið er í eigu sömu eigenda og eiga FC Midtjylland í Danmörku sem leikur í Meistaradeildinni í ár.

Uppfært: Brentford hefur nú staðfest komuna og mun hann ganga í B-lið félagsins.