RAX Augnablik: „Það var eitthvað mennskt við Qerndu“

„Ole kenndi mér það að þegar ég fer með veiðimönnum út á hafísinn, að passa mig hvað ég segi .Þegar þú færð svona frá reynsluboltum þá virðir maður það,“ segir ljósmyndarinn Ragnar Axelsson. Í nýjasta þættinum af RAX augnablik, segir hann söguna um einstakt samband grænlenska veiðimannsins Ole og hundsins Qerndu. Sagan kenndi honum ýmislegt um virðingu fyrir náttúrunni en þáttinn má sjá í spilaranum hér fyrir neðan.

RAX hefur ferðast um Grænland síðustu fjóra áratugi og safnað myndum og sögubrotum af harðri lífsbaráttu Grænlendinga í sambýli við besta vin mannsins. Ein af þeim sögum sem er honum hvað minnistæðust, er saga Ole og Querndu. Hann Ole var einn af bestu veiðimönnum Grænlands en til að byrja með hafði hann verið neikvæður og veiddi ekkert sérstaklega vel.

„Það var eldri veiðimaður sem fylgdist með honum og sagði, þú ert of neikvæður. Þú verður að vera jákvæður því náttúran skynjar þig og hvernig þér líður. Þegar þú ferð of neikvæður þá skilar hún þér engu. Þú verður að hafa jákvætt hugarfar og þá kemur þetta til þín.“

Hugsuðu eins

Gamli maðurinn gaf Ole lítinn hvolp, sem fékk nafnið Qerndu en það þýðir svarti hundur.

„Þeir urðu vinir á punktinum. Querndu og Ole voru alltaf saman og hlupu út um allt og léku sér.“

Eftir hálft ár þurfti Ole að setja hundinn í keðju eins og venjan er á Grænlandi og byrjuðu þeir þá að vinna saman, meðal annars við ísbjarnarveiðar á ísnum.

„Ole sagði, að það var eitthvað mennskt við Qerndu. Hann var eins og maður, við hugsuðum einhvern veginn eins. Þetta var uppáhalds hundurinn hans og sá gáfaðasti sem hann hefur nokkurn tímann átt.“

RAX segir að á Grænlandi sé hundurinn ríkur þáttur í menningu og daglegu lífi, svo mikið að hann nánast rennur saman við samfélagið og náttúruna. Í þættinum Ole og Querndu segir RAX hvernig þeirra saga kenndi honum að það er ekki ráðlegt að segja hvað sem er úti í náttúrunni á Grænlandi, maður getur fengið það í bakið einn daginn.

Í þessum þætti af RAX Augnablik má meðal annars sjá nokkrar ljósmyndir úr nýrri bók hans sem kemur út á næstu vikum. Í bókinni Hetjur norðurslóða tekur hann saman brot af þeim myndum sem hann hefur tekið af grænlenskum veiðimönnum og veiðihundunum þeirra. Bókin er óður til grænlenska sleðahundsins og sambandsins sem myndast hefur milli manns og hunds í veiðimannasamfélaginu á Grænlandi.

Bókin er gefin út af Kehrer Verlag í í Þýskalandi, Bretlandi og Bandaríkjunum sem og af Querndu, útgáfufélagi RAX hér á landi, sem heitir sama nafni og hundurinn í sögu þáttarins. Elsta myndin í bókinni var tekin árið 1986 og sú yngsta er rétt ársgömul. Saman segja þær frá hrikalegum umskiptum í náttúru manna og dýra.