Handtekinn á Hlemmi vegna líkamsárásar

Karlmaður var handtekinn á Hlemmi um kl. 16 í dag, grunaður um líkamsárás. Að minnsta kosti einn hlaut áverka eftir að hafa verið sleginn í andlitið af handtekna. Viðkomandi gistir fangageymslur lögreglu en ekki var unnt að ræða við hann sökum ölvunarástands.

Lögregla handtók einnig ökumann um kl. 14 í dag sem rásaði mjög á Vesturlandsvegi. Ók hann bifreið sinni nokkrum sinnum á öfugum vegarhelming. Ökumaðurinn var fyrst grunaður um að vera undir áhrifum áfengis en reyndist einnig undir áhrifum fíkniefna.