„Þegar ég byrjaði að mála mig í dragi vissi ég ekkert hvað ég var að gera"

Í öðrum þætti af Snyrtiborðið með HI Beauty fengu þær heimsókn frá dragdrottningunni Gógó Starr. Gógó er hliðarsjálf Sigurðar Heimis Guðjónssonar og er þekkt fyrir einstakan stíl, áberandi förðun og hárgreiðslur.

„Þegar ég byrjaði að mála mig í dragi vissi ég ekkert hvað ég var að gera," viðurkennir Gógó í þættinum.  „En maður lærir ótrúlega mikið á því að fikta og prófa sig áfram með fleiri og fleiri vörurm, kynnast fleira fólki og síðan Youtube."

Gordjöss allt kvöldið

Á netinu náði Gógó að læra ótrúlega margt um förðun. Í þættinum segir dragdrottningin að það taki í dag einn til tvo tíma að gera sig klára fyrir sviðið. Það er ekki nóg að gera flotta förðun heldur þarf líka að passa að hún endist uppi á sviði. 

„Það erfiðasta var að finna þennan balance, hvernig ég get verið gordjöss allt kvöldið."

Gógó er ein af fáum atvinnudragdrottningum hér á landi og hefur mikla reynslu af því að koma fram á sviði. Hún hefur stolið senunni á fjölda viðburða enda ótrúlegur karakter. Þær Heiður Ósk og Ingunn fengu að heyra allt um lúkk þessarar drottningar í gegnum árin og sjá ofan í snyrtitöskuna hennar. 

Hægt er að horfa á þáttinn í heild sinni í spilaranum hér fyrir neðan.