Stjörnur Perugia hringja í stuðningsmenn | Eldri hjón héldu að um símaat væri að ræða

Leikmenn ítalska knattspyrnufélagsins Perugia hafa reynt að gera sitt til að létta stuðningsmönnum félagsins lífið nú þegar Ítalir þurfa allir að vera í heimasóttkví vegna kórónuveirunnar.

Helstu stjörnur Perugia-liðsins hafa hringt í ársmiðahafa félagsins til þess eins að spjalla við þá og stytta þeim stundir á erfiðum tímum.

Perugia birti á Facebook vídjó af því þegar markvörðurinn Guglielmo Vicario hringdi í eldri hjón sem átt hafa ársmiða á heimaleiki Perugia í meira en hálfa öld. Það tók Vicario drykklanga stund að sannfæra hjónin um að ekki væri um símaat að ræða.

Þann 9. mars var öllum íþróttaviðburðum á Ítalíu frestað til 3. apríl hið minnsta til að hefta útbreiðslu kórónuveirunnar. Yfir 3.000 Ítalir hafa látist vegna veirunnar.