Enn fjölgar smitum í Vest­manna­eyjum

Þrjú ný smit kórónuveirunnar voru staðfest í gærkvöldi í Vestmannaeyjum og eru smit í eyjunum því orðin þrjátíu talsins. 

Af þessum þremur voru tveir í sóttkví og nú eru 475 Eyjamenn í sóttkví. 

Ákveðið hefur verið að skólahald í Grunnskóla Vestmannaeyja verði í formi fjarkennslu frá og með deginum í dag þar til annað verður tilkynnt. 

Í tilkynningu frá lögreglunni í Vestmannaeyjum segir að fjarkennsla sé nauðsynleg þar sem ekki sé hægt að manna hefðbundna kennslu miðað við samkomubann tíu og fleiri. 

Þrátt fyrir þetta verður kennsla í Hamarsskóla fyrir nemendur í 1. og 2. bekk sem eiga foreldra í framlínustörfum.