Hálfleikarnir mögulega styttri en 45 mínútur fari boltinn aftur að rúlla á Englandi

Gordon Taylor, framkvæmdarstjóri samtaka knattspyrnumanna á Englandi, segir að það verði mögulegar styttri hálfleikar á Englandi fari boltinn aftur að rúlla á næstu vikum.

Mikið hefur verið rætt og ritað um hvenær enska úrvalsdeildin kemst aftur af stað vegna kórónuveirunnar en nú eru leikmenn deildarinnar taldir eiga síðasta orðið í því hvort að boltinn fari aftur af stað. Þeir eru sagðir hafa áhyggjur af heilsu sinni byrji þeir aftur að spila.

„Þeir eru ekki vitlausir. Þeir munu setja heilsuna í fyrsta sæti,“ sagði Taylor er hann fór yfir stöðuna í samtali við BBC í morgun.

Eitt af málunum sem eru rædd þessa daganna innan sambandsins er hvort að stytta eigi leiktímann; það er að segja ekki leika tvisvar sinnum 45 mínútur. Ansi áhugaverð umræða.

Enska úrvalsdeildin vonast til þess að geta byrjað að spila aftur 8. júní.