Grindvíkingar missa Sigtrygg Arnar í atvinnumennsku á Spáni

Landsliðsbakvörðurinn Sigtryggur Arnar Björnsson mun ekki leika meira með Grindavík í Dominos-deild karla á tímabilinu en keppni hefst væntanlega á ný í vikunni.

Sigtryggur Arnar hefur samið við spænska liðið Real Canoe í Madríd sem leikur í LEB Oro-deildinni á Spáni eða næstefstu deild.

Grindvíkingar sjá þarna á eftir mjög öflugum leikmanni og það rétt áður en keppni byrjar á nýjan leik. Arnar var með 17,8 stig að meðaltali í leik á síðasta tímabili og hefur verið einn af lykilmönnum liðsins. Hann gekk til liðs við Grindavík vorið 2018.

„Þetta tækifæri kom óvænt upp. Ég er mjög þakklátur stjórn körfuknattleiksdeildar Grindavíkur fyrir að sýna þessu skilning og gefa mér heimild til að fara í atvinnumennsku. Stefnan var sett á að gera góða hluti með Grindavík eftir áramót. Þetta tækifæri er of gott til að sleppa því á þessum tímapunkti á mínum ferli. Ég vil koma á framfæri kveðju til stuðningsmanna Grindavíkur sem hafa tekið vel á móti mér frá fyrsta degi. Mér hefur liðið mjög vel hjá félaginu og mun fylgjast grannt með gengi Grindavíkur áfram,“ segir Sigtryggur Arnar í samtali við fésbókarsíðu Grindavíkur.

Körfuknattleiksdeild Grindavíkur hefur hafið leit að nýjum leikmanni til að leysa Arnar af hólmi.

Sigtryggur Arnar hefur spilað vel með íslenska landsliðinu í forkeppninni fyrir undankeppni HM 2023 og er með 12,8 stig í leik og 42 prósent þriggja stiga nýtingu í fjórum leikjum þar af 18 stig í leik í leikjunum tveimur í febrúar í fyrra. Hann hafði ekkert spilað í langan tíma fyrir leikina í lok nóvember.

Sigtryggur Arnar er ekki eini leikmaðurinn í deildinni því Kári Jónsson samdi á dögunum við lið Bàsquet Girona.