Skip­verjum létt að málinu sé lokið en furða sig á refsingunni

Tuttugu og tveir skipverjar af tuttugu og fimm sýktust af kórónuveirunni um borð í frystitogaranum í október síðastliðnum.

Skipstjórinn, Sveinn Geir Arnarsson, játaði sök þegar mál gegn honum var þingfest fyrir Héraðsdómi Vestfjarða á fimmtudag. Var honum gert að greiða 750 þúsund króna sekt og sæta sviptingu skipstjórnarréttinda í fjóra mánuði.

Sveinn var ákærður fyrir að brjóta gegn annarri málsgrein 34. greinar sjómannalaga, en þar segir:

„Ef ástæða er til að ætla að skipverji sé haldinn sjúkdómi sem hætta stafar af fyrir aðra menn á skipinu skal skipstjóri láta flytja sjúklinginn í land ef eigi reynist unnt að verjast smithættu á skipinu.“

„Að því gefnu að upplýsingar félagsins séu réttar er allur vafi tekinn af varðandi réttarstöðu þeirra skipverja sem staðið hafa í veikindum í veiðiferðinni og í kjölfar hennar, en útgerð er ábyrg fyrir ákvörðunum skipstjóra valdist skaði af. Heilsufar flestra skipverja hefur sem betur fer verið að þokast til betri vegar, en þeir sem enn glíma við veikindi eru nú í vissu um að þeir haldi launum til jafns við það sem þeir hefðu haft væru þeir vinnufærir og heilir heilsu,“ segir í yfirlýsingu VerkVest.

Skipverjar undrandi á refsingunni

Þá segir í yfirlýsingu að skipverjar sem hafi haft samband við verkalýðsfélagið séu undrandi á að hafa gengið í gegnum tímabil þar sem þeir töldu lífi sínu og heilsu ógnað, „og sjá svo að refsingin sem skipstjórinn er dæmdur til sé ekki ólík refsingu fyrir samlokustuld í Krónunni,“ eins og það er orðað í yfirlýsingunni.

Í yfirlýsingunni er einnig tæpt á því að sú þjáning sem skipstjórinn hefur orðið fyrir „vegna sinna mistaka, ekki ásetningsbrots, heldur mistaka og dómgreindarleysis,“ sé minna í sviðsljósinu. Telur verkalýðsfélagið að í málinu hafi allir tapað og er það von félagsins að íslenskir sjómenn þurfi aldrei að upplifa annað slíkt mál um ókomna tíð.

„Nú er liðið vel á þriðja mánuð frá því þessari örlagaríku veiðiferð lauk og þrátt fyrir batnandi heilsu flestra skipverja á það ekki við um alla, en of snemmt er að segja til um hvort allir nái fullri heilsu á ný. Allir sem að málinu koma gera sitt besta til að lágmarka þann skaða sem hlotist hefur, en ekki er hægt að líta fram hjá því að hvorki er um slys né veikindi af eðlilegum orsökum að ræða.“

Þá segir að rangar ákvarðanir sem teknar hafi verið hafi valdið skipverjum alvarlegum skaða. Samfélagslegur kostnaður vegna þess sé nú þegar orðinn gríðarlegur, sem og fjárhagsskaði útgerðarinnar. Álitshnekkir fyrir svæðið verði ekki metnir til fjár.