Ætlaði að hafa allt fullkomið en lenti á vegg og brann út

Hún hvetur foreldra til að setjast niður og skoða hvernig þeir vilji hafa hlutina, forgangsraða því sem skiptir raunverulega máli.

Smá kæruleysi hjálpar

„Er það kannski dýrkeypt ef ég er að þrífa langt fram á nótt og ég hef kannski ekki sofið svo vikum skiptir, er það þess virði? Er það það sem skiptir máli eða þarf að breyta þessu eitthvað?“

Hún segir að fyrstu árin í lífi barna séu oft svolítil óreiða fyrir foreldra, sem sé algjörlega eðlilegt.

„Þú getur ekki haft allt tipp topp, þú þarft að vera með temmilegan skammt af kæruleysi og það er sumt sem þarf bara að fjúka,“segir Eva Rún Guðmundsdóttir. 

Margir foreldrar tala um það í lokaþættinum á Líf dafnar, að það þurfi að passa upp á væntngastjórnun þar sem margt breytist þegar fólk eignast börn. Nefnd eru dæmi eins og heimilisþrif, kvöldmaturinn, ferðalög og fleira.

Miklar samfélagslegar kröfur

„Þegar yngsta dóttir mín er eins og hálfs árs þá lendi ég á vegg, ég bara „krassa“ og fer í bullandi burnout,“ segir Sólveig María Svavarsdóttir.

„Ég var alveg manneskja sem fór út í lífið með fullkomnunaráráttu og kvíða, kvíði er rosalega tengdur fullkomnunaráráttu. Ég var rosalega týpísk íslensk kona, gerði rosalega vel í vinnunni, vildi hugsa rosalega vel um börnin, hafa húsið hreint og allt þetta. Samfélagslegar kröfur sem ég taldi eðlilegar einhvern veginn, ólst kannski svolítið upp við og fór með út í lífið.“

Sólveig segist hafa verið týpan sem þurfti að gera allt alveg sjúklega vel og kunni ekki að stoppa sig af.

„Ég slakaði ekkert á þó að ég væri komin með fjögur börn og væri inn á milli ein með þau.“

Eftir að Sólveig brann út hefur hún verið í uppreisn gegn fullkomnunaráráttunni.

„Að vera ófullkomin, að lifa hægu lífi. Það má vera drasl heima hjá mér. Ég forgangsraða algjörlega í lífinu, ég þarf ekki að gera allt. Ég vel hverja ég hitti og set meiri mörk á sjálfa mig og aðra.“

Hér fyrir neðan má sjá brot úr lokaþættinum þar sem heyra má nokkra foreldra ræða foreldrahlutverkið, væntingar og raunveruleikann.