Rosalegt keppnisskap Hlyns: „Hann drap sig hreinlega á hverri einustu æfingu“

Hlynur hefur tekið fleiri Íslandsmet af Kára síðustu ár og er nú handhafi Íslandsmeta í sjö greinum utanhúss, eftir að hafa slegið metið í maraþoni í Dresden í Þýskalandi í gær.

Hlynur hefur verið búsettur í Hollandi frá árinu 2018 og keppti áður fyrir Eastern Michigan háskólann í Bandaríkjunum. Snemma á hlaupaferlinum var Eyjamaðurinn hins vegar æfingafélagi Kára Steins, þegar þeir æfðu undir handleiðslu Gunnars Páls Jóakimssonar.

Óttaðist að hann myndi keyra sig út þegar þeir æfðu saman

Keppnisskapið í Hlyni, sem nú hefur meðal annars skilað honum Íslandsmetum í sjö hlaupagreinum utanhúss, var alltaf augljóst:

„Ég man það alveg að hann var grjótharður. Það er rosalegt keppnisskap í honum. Þarna fyrir mörgum árum, þegar hann var langt frá mínu getustigi, þá skipti það hann engu máli. Hann óð alltaf í mann og reyndi að fylgja manni eins og hann gat, og hvellsprakk þá bara í staðinn fyrir að sýna einhverja skynsemi,“ segir Kári Steinn.

„Hann gaf aldrei þumlung eftir – drap sig hreinlega á hverri einustu æfingu og maður óttaðist að það væri kannski of mikið kapp í honum. Að hann myndi bara keyra sig út á þessu öllu saman. En hann hefur heldur betur afsannað það. Svo hefur hann eflaust lært með árunum að sýna aðeins meiri skynsemi, en það sást strax hversu mikill keppnismaður hann er.“

Kári segir það í raun ekki koma á óvart að Hlyni hafi tekist að slá Íslandsmet í sínu fyrsta maraþonhlaupi. Hlynur hljóp á 2:13:37 klukkustundum en metið hans Kára var 2:17:12. Hlynur ætlaði sér að ná ólympíulágmarki en var tæpum tveimur mínútum frá því, eftir að hafa haldið nægilega góðum hraða fram að síðustu kílómetrum hlaupsins.

Erfiðir síðustu kílómetrar en hann á nóg inni

„Það er ótrúlega flott hjá honum að klára á þessum tíma því þetta er brútal grein. Þegar menn fara að missa hraðann þá geta þeir misst hausinn og farið hressilega niður. Í 50% en ekki bara 80 eða 90%. Þetta verða stór skil þegar menn missa taktinn. En hann var kominn það langt inn í hlaupið að hann náði að kreista sig í gegnum síðustu kílómetrana. Þetta hafa verið helvíti erfiðir síðustu kílómetrar hjá honum,“ sagði Kári Steinn.

„Hann hljóp þrátt fyrir allt á hörkutíma og slátraði alveg þessu meti, svo það er ágætissárabót þó svo að hann hafi að sjálfsögðu viljað ná þessu lágmarki. Hann hefur eflaust vitað að þetta væri mjög bratt markmið, þó að hann hafi vissulega átt góðan séns eins og hann sýndi. Hann á nóg inni, þetta er hans fyrsta hlaup og hann náði ekki að útfæra það fullkomlega. Það kemur bara næst þá,“ sagði Kári.

Á enn mörg ár til að bæta sig og ætti að horfa til Parísar

Hlynur, sem er 27 ára gamall, hefur gefið út að hann muni ekki reyna aftur við lágmarkið fyrir Ólympíuleikana í Tókýó. En ætti hann ekki hiklaust að stefna á leikana í París eftir þrjú ár?

„Jú, mér finnst það. Hann hefur sýnt að hann er greinilega týpan í maraþon. Hann er hörkugóður á hlaupabrautinni líka, þar sem menn eru kannski að toppa rétt fyrir þrítugt, en í maraþoni geta menn verið að toppa til 35 ára aldurs. Hann veit best sjálfur hvað er skynsamlegt en það gæti verið gott hjá honum að taka tvö ár á hlaupabrautinni í viðbót, vinna í hraðanum. Að sama skapi gæti hann fært sig strax upp í maraþonið frekar,“ sagði Kári.