Slógu met Jakobs Jóhanns og Hjartar Más frá síðustu öld

Daði Björnsson sló met Jakobs Jóhanns Sveinssonar í hundrað metra bringusundi en það hafði Jakob Jóhann sett á síðustu öld eða árið 1999.

Daði Björnsson setti piltamet í 100 metra bringusundi en tíminn var millitími úr 200 metra bringusundi og var millitíminn 1:04,52 mín. Gamla metið var í eigu Jakobs Jóhanns Sveinssonar frá árinu 1999, 1:05,08 mín.

Fannar Snævar Hauksson úr ÍRB setti piltamet í 50 metra flugsundi en hann varð annar á tímanum 25,60 sek. Gamla metið var 25,89 sek. í eigu Hjartar Más Reynissonar frá árinu 2000.

Fannar Snævar hafði áður slegið 23 ára gamalt piltamet í 100 metra flugsundi en hann vann greinina á tímanum 57,12 sek. Gamla metið var 57,63 sek. í eigu Hjartar Más Reynissonar.

Freyja Birkisdóttir úr Breiðabliki setti stúlknamet í 1500 metra skriðsundi en hún vann greinina á tímanum 17:32,11 mín. Stúlknametið var 17:34,44 mín. Hún stefnir hraðbyri í átt að Íslandsmetinu í greininni en það er 17:17,61 mín. Tíminn hennar var einnig undir EMU lágmarkinu, sem er 17:49,17 mín.

Freyja hafði áður sett stúlknamet í 800 metra skriðsundi þegar hún vann greinina á tímanum 9:09,32 mín. en sá tími er einnig undir EMU lágmarkinu, sem er 9:19,56 mín. Gamla metið var 9:09,94 mín. frá árinu 2015.

Piltasveit SH setti piltamet í 4x100m fjórsundi í síðasta riðli mótsins þegar þeir syntu á tímanum 4:05,77 mín. Gamla metið var 4:16,12 mín. í eigu ÍRB frá árinu 2012. Sveit SH skipuðu þeir Veigar Hrafn Sigþórsson, Snorri Dagur Einarsson, Birnir Freyr Bjarnason, Bergur Fáfnir Hálfdánarson.