Valskonum spáð Íslandsmeistaratitlinum

Það eru forráðamenn, þjálfarar og fyrirliðar liðanna sem að eiga atkvæðisrétt í spánni sem kynnt var á fundi í höfuðstöðvum KSÍ nú í hádeginu. Upptöku frá því að spáin var kynnt má sjá hér að neðan.

Breiðablik á titil að verja sem Íslandsmeistari en hefur misst magnaða leikmenn úr sínum hópi auk þess sem þjálfari liðsins tók við landsliðinu.

Valsliðið fékk aðeins sex stigum meira en Breiðablik í spánni og það má því búast við harðri baráttu á milli Vals og Breiðabliks eins og síðustu tímabil.

Keflavík og Tindastóll eru nýliðar í deildinni og er um frumraun Sauðkrækinga að ræða í efstu deild. Keflavík fékk mun fleiri stig en Tindastóll og var bara sjö stigum á eftir ÍBV sem rétt sleppur við fall samkvæmt spánni.

Pepsi Max deild kvenna hefst annað kvöld með tveimur leikjum en klárast svo með þremur leikjum á miðvikudaginn.