Sigursteinn: Fannst halla stórkostlega á okkur í dómgæslunni

„Það er erfitt að lýsa þessu. Þetta er ógeðslega svekkjandi,“ sagði Sigursteinn við Vísi í leikslok.

FH var yfir nánast allan leikinn og þegar þrjár mínútur voru eftir var liðið með þriggja marka forskot, 33-30. Sigursteinn átti ekki skýringu á því hvað gerðist á lokakaflanum.

„Ég get eiginlega ekki svarað því. Þetta var alltaf að fara að enda í stöngin inn, stöngin út í lokin,“ sagði Sigursteinn.

„En ég er stoltur af liðinu mínu. Það lagði mikið í þetta en því miður dugði það ekki.“

FH-ingar fengu ellefu brottvísanir í leiknum gegn fimm brottvísunum Eyjamanna. Sigursteinn var ekki sáttur með frammistöðu dómaranna.

„Ef þú vilt fá heiðarlegt svar fannst mér halla stórkostlega á okkur í dómgæslunni en ég fæ ekkert út úr því að væla yfir því. Svona er þetta.“

Sigursteinn var að ljúka sínu öðru tímabili með FH og verður áfram við stjórnvölinn í Kaplakrika.

„Ég verð áfram og við verðum áfram með gott lið,“ sagði Sigursteinn að lokum.

Olísdeildirnar í handbolta eru á Stöð 2 Sport en upplýsingar um útsendingar má finna hér. Olísdeildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.