5 dagar í EM: „Húh-ið“ varð heimsfrægt eftir sigurinn ógleymanlega í París

Íslenska karlalandsliðið í knattspyrnu tryggði sér sæti í sextán liða úrslitum Evrópumótsins í Frakklandi sumarið 2016 með 2-1 sigri á Austurríki í lokaleik riðilsins. Arnór Ingi Traustason skoraði sigurmarkið með dramatískum hætti í blálokin og íslenska liðið hafi tryggt sér óskaleik á móti Englendingum.

Eftir leikinn þá steig fyrirliðinn Aron Einar Gunnarsson fram fyrir hópinn og stýrði sameiginlegu Víkingaklappi íslensku strákanna og fjölmargra Íslendinga sem voru í stúkunni á Stade de France í París.

Þetta var mjög áhrifamikil stund enda allir í miklum tilfinningarússibana eftir sögulegt afrek íslenska landsliðsins á sínu fyrsta stórmóti. Það var líka fagnað vel og innilega á Stade de France leikvanginum þar sem strákarnir okkar sungu með stuðningsmönnum landsliðsins þar sem lagið „Lífið er yndislegt“ með Landi og sonum fékk að hljóma á þjóðarleikvangi Frakka.

Þessi stund var frábær myndskreyting við árangur Íslands en þessi litla rúmlega þrjú hundruð þúsund manna þjóð norður í Atlantshafi var komið í sextán liða úrslit á sínu fyrsta stórmóti. Erlendir fréttamiðlar sýndu húh-ið okkar Íslendinga við hvert tækifæri og það voru ekki margir sem vissu ekki hvað það var.

Aron Einar Gunnarsson sagði við Vísi eftir leikinn að hann myndi aldrei eiga eftir að gleyma fagnaðarlátunum eftir leik.

„Þegar Arnór skoraði fór ég í minn eigin heim en svo labbar maður að áhorfendunum og sér allt fólkið sitt og þá veit maður að maður mun aldrei gleyma þessum stundum. Þetta er akkúrat það sem ég vildi og ég mun muna eftir þessari stund þar til ég dey,“ sagði Aron Einar.

Heimir Hallgrímsson, þjálfari íslenska liðsins var líka yfirlýsingaglaður eftir leikinn. „Orðum það þannig. Ég held að þýðing þessa sigurs fyrir íslensku þjóðina að það sé örugglega vilji nú til þess að breyta þjóðhátíðardeginum úr 17. júní í 22. júní,“ sagði Heimir en ævintýrið var ekki búið enn.

Stuðningsmenn íslenska liðsins áttu eftir að fara með Víkingaklappið í sjónvarpsþætti erlendis og fleiri áttu eftir að taka það upp. Eins og var með mexíkönsku bylgjuna á níunda áratugnum þá var íslenska hú-ið orðið hluti af knattspyrnusögunni.

Nú er bara spurning hvort einhver þjóð fái Víkingaklappið lánað á Evrópumótinu í sumar.

EM 2020 verður sýnt á Stöð 2 Sport EM 2020 sem er hluti af Sportpakkanum, Stóra pakkanum og Risapakkanum. EM 2020 verður einnig hægt að kaupa stakt á kr. 6.990 en fyrir viðskiptavini með aðra áskrift en ofangreindar frá Stöð 2 kostar áskriftin kr. 3.990.