Spariafmælistónleikar fyrstu plötu Moses Hightower

Platan verður flutt í heild – með lúðrum, bakröddum og mörgum af upprunalegu flytjendunum. 

„Sum lögin á fyrstu plötunni höfum við ekki spilað síðan sirka 2011, þannig að þetta verður fróðlegt. Hljómsveitin er allt öðruvísi í dag, og meðlimirnir auðvitað farnir að láta talsvert á sjá, en við erum enn að,“ segir Steingrímur Karl Teague meðlimur sveitarinnar í samtali við Vísi. Hann segir að um sé að ræða sérstaka spariafmælistónleika. 

Tónleikarnir fara fram 10. og 11. júní í Bæjarbíói í Hafnarfirði, 12. júní á Græna hattinum Akureyri og  20. júní í Midgard Base Camp, Hvolsvelli. Einnig verða þar flutt nýrri lög, til dæmis af nýjustu plötu þeirra Lyftutónlist. Nánari upplýsingar má finna á Facebook síðu viðburðarins.

„Þegar fyrsta plata hljómsveitarinnar Moses Hightower, Búum til börn, kom út í júlí 2010 voru gagnrýnendur og hlustendur sammála um að hér kvæði við nýjan tón í íslenskri tónlist. Útsetningar, hljóðheimur og spilamennska sóttu óspart í sálartónlist 7. og 8. áratugar, en textar þóttu minna á íslenskt lopapeysupopp frá sama tímabili, ekki síst Spilverk þjóðanna. Í öllu falli var plötunni tekið fagnandi, og lögin „Vandratað“ og „Bílalest út úr bænum“ hljómuðu látlaust úr viðtækjum landsins,“ segir í tilkynningu um tónleikana.

 Í kjölfarið birtist platan á hinum og þessum listum yfir bestu plötur ársins, og sveitin fékk tilnefningar til Íslensku tónlistarverðlaunanna fyrir plötu ársins og textahöfunda ársins.

„Í tilefni þess að 11 ár eru liðin frá útgáfu plötunnar (gisp!) ætlar hljómsveitin að halda tónleika hringinn í kringum landið, skrýdd mörgum af sömu silkimjúku gestaflytjendunum og heiðruðu hana á plötunni: Óskar Guðjónsson leikur á sax, Samúel Jón Samúelsson á básúnu og Kjartan Hákonarson á trompet og flugelhorn, og bakraddir syngja Bryndís Jakobsdóttir og Rakel Sigurðardóttir. Sannkallaðir sparitónleikar þar sem platan verður leikin í heild sinni, ásamt feikivel völdum öðrum lögum Mosesar, m.a. af nýjustu plötu þeirra, Lyftutónlist!“