Kristrún til Selfoss frá austurrísku meisturunum: „Leikmaður að mínu skapi“

Kristrún hefur farið víða á síðustu árum og leikið á Ítalíu, í Noregi, Danmörku, Svíþjóð og Austurríki þar sem hún varð meistari með St. Pölten á síðasta tímabili.

„Það er frábært að fá Kristrúnu í okkar hóp. Við þekkjum hana vel og hún er leikmaður að mínu skapi. Hún getur leyst margar stöður, er ósérhlífin og vill vinna mikið og æfa mikið. Hún kemur með gæði og reynslu inn í hópinn og svo er hún með stórt Selfosshjarta, þannig að það er mikil tilhlökkun að fá hana heim,“ segir Alfreð Jóhannsson, þjálfari Selfoss, í fréttatilkynningu frá félaginu.

Kristrún, sem er 26 ára, lék síðast með Selfossi sumarið 2018. Hún lék þá átta leiki í Pepsi Max-deildinni og skoraði eitt mark. Kristrún hefur alls leikið 94 leiki fyrir Selfoss í deild og bikar og skorað fjórtán mörk.

Kristrún gæti leikið sinn fyrsta leik með Selfossi eftir heimkomuna þegar liðið sækir nýliða Tindastóls heim á miðvikudaginn. Selfoss er í 3. sæti Pepsi Max-deildarinnar með þrettán stig, tveimur stigum á eftir toppliði Breiðabliks.

Selfoss mætir Þrótti í átta liða úrslitum Mjólkurbikarsins klukkan 19:15 í kvöld.

Pepsi Max deild kvenna er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.