„Ekki sá dug­legasti að læra í Versló“ en lauk meistara­gráðu í geim­vísindum á dögunum

Björn Bergsson útskrifaðist á dögunum með meistaragráðu í geimvísindum frá danska tækniháskólanum (DTU). Björn lærði eðlisfræði og stjarneðlisfræði í Háskóla Íslands eftir útskrift úr Verzlunarskólanum.

„Eftir grunnnámið þá var ég að skoða möguleikana í Danmörku því þar þekkir maður marga og ég rakst þá á þetta nám, geimvísindi.“

Aðspurður segir hann að í náminu felist meðal annars stjarneðlisfræði auk þess sem nemendum er kennt að byggja og hanna gervihnattatungl og nota gögn úr þeim til að gera allskonar rannsóknir. Bæði til að fylgjast með jörðinni og gera rannsóknir úti í geimi.

„Ég endaði á því að fókusa mest á geimvísindin. Það er hægt að koma í þetta nám með fjölbreytta bakgrunna. Minn grunnur var eðlisfræði en það er til dæmis líka hægt að fara í það með grunn í rafmagnsverkfræði eða vélaverkfræði.“

Fimmtán í árgangi

Hann segir að námið hafi verið skemmtilegt en krefjandi.

„Ég kynntist krökkunum í náminu vel því það eru auðvitað ekki margir sem ákveða að læra þetta. Við vorum fimmtán í árgangi. Ég var mjög heppinn því ég byrjaði í náminu haustið 2019 þannig að fyrsta önnin var alveg eðlileg og fyrri hluti seinni annar fyrsta ársins en svo skall Covid-19 á. Þannig að hluti námsins fór fram á rafrænu formi en þar sem við vorum fá í árgangi fengum við stundum að mæta upp í skóla þegar fjöldatakmarkanir leyfðu.“

Missti af vettvangsferðum vegna Covid19

„Það var aðeins um vettvangsferðir í náminu en það var mest innan skólans eftir að Covid19 skall á. Til dæmis var á dagskrá mjög spennandi ferð þar sem prófanir voru gerðar á gervihnattatunglum áður en þeim er skotið upp á loft. Við áttum að fylgjast með því en svo varð ekki úr því þegar kennslan fór í rafrænt form en ég kvarta þó ekki.“

Sagður fyrsti Íslendingurinn til að klára námið

Hann segir námið alþjóðlegt og að fólk komi alls staðar frá.

„Það komu margir frá Spáni, Frakklandi, Grikklandi og Ítalíu. Ég var sá eini sem flutti frá norðri til suðurs. Ég fór í góða veðrið í Danmörku en hinir fóru allir úr góðu veðri í verra. Svo auðvitað voru danskir nemendur en mér var sagt að ég væri eini Íslendingurinn sem hefur klárað þetta nám.“

Hann segir námið fjölbreytt og að hver og einni geti fundið sína hillu. Skólinn sé framarlega í geimvísindum og vinnur í nánu samstarfi við geimbransann.

„Deildin er í miklu samstarfi við Evrópsku geimfarastofnunina (ESA) og Bandarísku geimferðarstofnunina (NASA). Deildin tók mikinn þátt í Mars jeppanum sem sendur var upp árið 2020 og lenti 2021. Þannig það er mjög gaman að læra í þessu umhverfi.“

Hann segir möguleikana mikla að námi loknu þó tækifærin séu ekki mörg hérlendis.

„Á Íslandi er geimbransinn ekki risastór þannig möguleikarnir eru minni hér. En í Danmörku eru yfir 200 einkafyrirtæki sem tengjast geimbransanum á einn eða annan hátt. Svo er líka hægt að reyna við þessar alþjóðlegu stofnanir eins og ESA eða NASA.“

Stefnir á doktorsnám

Í haust mun Björn hefja störf há upplýsingatæknifyrirtæki.

„Það er ekki beint tengt geimnum en mér finnst það spennandi því fyrirtækið er alþjóðlegt og maður fær mikla kennslu þar. Þó maður sérhæfi sig í geimvísindum þá er vel hægt að starfa á öðrum sviðum. Líklegast fer ég síðan í doktorsnám í geimvísindum í framtíðinni.“

Inntur eftir því hver draumurinn sé segist Björn vera með eitt skýrt markmið.

„Það er að gera eitthvað á hverjum degi sem mér finnst skemmtilegt. Ef það eru geimrannsóknir þá er það geggjað en ef það er í öðrum geira og skemmtilegt þá er ég til í það líka. Svo kemur bara í ljós hvar ég enda.“

„Ekki sá duglegasti að læra í Versló“

Hann segir að námsvalið hafi ekki komið fólki sérstaklega á óvart þar sem hann hafði klárað grunnnám í stjarneðlisfræði.

„Það kom fólki kannski frekar á óvart að ég skyldi velja eðlisfræðina því ég var ekki sá duglegasti að læra í Versló. Þar hafði ég meiri áhuga á félagslífinu. Það er auðvitað smá pakki að fara í Versló, þaðan í heimsreisu og vinda sér svo í eðlisfræðina. Allt í einu var maður kominn í hóp þar sem allir hafa alltaf verið duglegir að læra og með áhuga á faginu. Svo kviknaði mikill áhugi hjá mér. Til þess að vera í náminu þá þarf áhuginn að vera til staðar því þetta er krefjandi nám.“

Tunglið vekur áhuga

„Það væri mjög gaman að rannsaka tunglið og gera geimrannsóknir við tunglið. Ég er ekki með neitt markmið að verða geimfari eða neitt þannig en auðvitað eru mörg störf sem tengjast því mjög spennandi.“

Þá mælir hann hiklaust með náminu.

„Ég myndi mjög mikið mæla með þessu námi. Alveg hiklaust. Það er hægt að koma inn í það með fjölbreyttan bakgrunn og finna svo sitt svið. Þó það sé auðvitað mjög gott að hafa bakgrunn í stærðfræði eða eðlisfræði.“