Mikill erill hjá Landhelgisgæslunni í nótt

Í tilkynningu Landsbjargar segir að í gærkvöldi hafi skúta, sem legið hafði við akkeri í Hornvík, haft samband við sjómælingaskipið Baldur og óskað aðstoðar Landhelgisgæslunnar. Skútan hafi þá verið lögð af stað áleiðis til Ísafjarðar með mjög veikan farþega og fór ástand hans versnandi. Talstöðvasamband við skútuna var slitrótt og datt alveg út þegar hún var komin að og vestur með Hælavíkurbjargi.

Áhöfnin á Baldri hafði þegar í stað samband við stjórnstöð Landhelgisgæslunnar sem kallaði út björgunarskip Slysavarnafélagsins Landsbjargar, Gísla Jóns, frá Ísafirði og þyrlu Landhelgisgæslunnar, TF-EIR. Áhöfnin á Baldri létti akkeri og hélt á fullri ferð að skútunni. Vegna takmarkaðra fjarskiptaskilyrða við skútuna var áhöfnin á Baldri í lykilstöðu við að koma upplýsingum áleiðis til stjórnstöðvarinnar í Reykjavík og læknis til að meta stöðuna.

Baldur kom að skútunni skammt norðvestur af Hælavíkurbjargi. Ákveðið var að farþeginn yrði fluttur um borð í Baldur þar sem áhöfnin hlúði að honum. Haldið var á fullri ferð áleiðis til Ísafjarðar og í Aðalvík kom sjúkraflutningamaður af björgunarskipinu Gísla Jóns um borð til aðstoðar sem og tveir björgunarsveitarmenn. Þyrla Landhelgisgæslunnar var komin á staðinn á þriðja tímanum og hífði sjúklinginn um borð í þyrluna og flutti á Landspítalann í Reykjavík.

Þyrlan gat ekki staldrað við lengi

Þá segir í tilkynningunni að þegar þyrlan var nýlent á Reykjavíkurflugvelli hafi verið óskað eftir þyrlu Landhelgisgæslunnar vegna veikinda á Patreksfirði. Þyrlan fór því aftur vestur á firði og kom viðkomandi undir læknishendur í Reykjavík. Þyrlan var komin á Reykjavíkurflugvöll klukkan 07:35 í morgun og því sé alveg óhætt að segja að nóttin hafi verið annasöm hjá þyrlusveit Landhelgisgæslunnar, varðstjórum í stjórnstöð LHG og áhöfnum Baldurs og Gísla Jóns.