Framboðsfrestur til Alþingis rennur út tíunda september

Í tilkynningu frá dómsmálaráðuneytinu segir að fyrir þann tíma liggi ekki fyrir hvaða stjórnmálasamtök bjóði fram lista í komandi kosningum til Alþingis. 

Vegna þessa liggi ekki frammi upplýsingar um framboðslista og listabókstafi, á þeim stöðum þar sem kosning utan kjörfundar fari fram. 

Kjósendur sem greiði atkvæði utan kjörfundar skulu rita listabókstaf þess flokks sem þeir kjósa með eigin hendi. Stimplar með listabókstöfum verði til reiðu þegar fyrir liggi hverjir eru í framboði. 

„Lögum samkvæmt ber dómsmálaráðuneytinu að halda skrá um listabókstafi stjórnmálasamtaka sem buðu fram við síðustu alþingiskosningar og birta hana. Hefur það verið gert í Stjórnartíðindum. Jafnframt ber að birta viðbætur við auglýsinguna þegar nýjum listabókstöfum er úthlutað og er þær viðbætur að finna í auglýsingunni,“ segir í tilkynningunni.