Geta ekki haldið HM vegna Covid

Heimsmeistaramót félagsliða er árlegt mót þar sem meistarar allra heimsálfa etja kappi um heimsmeistaratitilinn. Mótið átti að snúa aftur til Japan í ár eftir að hafa verið haldið í Sameinuðu arabísku furstadæmunum 2017 og 2018 og í Katar síðustu tvö ár. Japan hefur oftast haldið keppnina, átta sinnum, síðast 2016.

Kórónuveirufaraldurinn hefur farið illa með Japan síðustu vikur þar sem stór alda smita fer nú yfir landið. Það hafði mikil áhrif á Ólympíuleikana og Ólympíumót fatlaðra þar sem engir áhorfendur voru heimilaðir.

Ákvörðunin um að færa mótið var tekin í ljósi þess að japönsk yfirvöld hafa framlengt neyðarlög vegna smitanna til loka þessa mánaðar hið minnsta. Japanska knattspyrnusambandið sá ekki fram á að geta haldið mótið í desember með eðlilegum hætti og gaf gestgjafaréttinn því frá sér.

Alþjóðaknattspyrnusambandið, FIFA, mun taka ákvörðun um hvar mótið verði haldið á allra næstu dögum.

Vera kann að þetta mót verði það síðasta sem við sjáum af keppninni í núverandi mynd. FIFA stefnir að því að stækka mótið, þar sem 24 lið frá öllum álfum muni taka þátt, og halda keppnina á fjögurra ára fresti. Mótið kemur í stað Álfukeppninnar í fótboltadagatalið, sem var ávallt haldin ári fyrir heimsmeistaramót.

Chelsea vann sér inn þátttökurétt á mótinu með sigri í Meistaradeild Evrópu í sumar og þá munu Afríkumeistarar Al Ahly frá Egyptalandi taka þátt, líkt og Auckland City frá Nýja-Sjálandi fyrir hönd Eyjaálfu.

Enn á eftir að útkljá Meistaradeild Norður-Ameríku, Suður-Ameríku og Asíu.