Arnar Gunnlaugs byrjaði viðtalið eftir leikinn á því að öskra

Víkingum tókst að landa sigri í leiknum og tryggja sér þar með toppsæti deildarinnar fyrir lokaumferðina um næstu helgi. Ingvar Jónsson varði víti frá KR í uppbótartíma leiksins og dramatíkin var ógurleg á lokasekúndunum.

Leikurinn var varla búinn þegar Gunnlaugur Jónsson var búinn að taka Arnar Gunnlaugsson í viðtal í útsendingu Stöð 2 Sport og það er óhætt að segja að þá hafi tilfinningarnar flætt frá þessum litríka þjálfara.

Pepsi Max Stúkan sýndi viðtalið og ræddi síðan um það á eftir. Það vakti athygli að æsingurinn var svo mikill að Arnar byrjaði viðtalið á því að öskra.

„Ég bara vúúú. Þetta var rosalegt. Ég sagði þér fyrir leikinn að það myndi eitthvað gerast í lokin,“ sagði Arnar og benti síðan á leikmenn sína fagna með mögnuðum stuðningsmönnum sínum. „Sjáðu þetta. Þetta er eitthvað fáránlegt handrit. Þetta er ótrúlegt,“ sagði Arnar.

„Ég er búinn að vera í þessum leik í mörg ár en þetta var eitthvað allt annað,“ sagði Arnar

„Við töluðum um það í hálfleik að halda haus. Mér fannst fyrri hálfleikurinn flottur en menn voru greinilega þungir á sér eftir bikarleikinn. Við börðumst og börðumst. Það hefur einhvern veginn allt gengið upp,“ sagði Arnar.

„Við megum fagna núna en svo bara fókus. Þetta er ekki alveg búið en fókus, fókus, fókus. Þetta er eitthvað það rosalegasta sem ég hef lent í og ferillinn minn er búinn að vera langur. Þetta var geggjað,“ sagði Arnar.

„Bæði lið eiga skilið að vinna þessa deild því bæði lið eru búin að vera frábær. Við erum komnir aðeins með yfirhöndina en við þurfum bara að ná tökum á okkar tilfinningum í vikunni, æfa vel og vera einbeittir eins og við erum búnir að vera í allt sumar. Þá klárum við þetta,“ sagði Arnar.

„Arnar talaði um að þeir þyrftu að ná stjórn á tilfinningum sínum í vikunni. Er það ekki bara hárrétt metið,“ spurði Guðmundur Benediktsson sérfræðinga sína þegar strákarnir í Pepsi Max Stúkunni fengu boltann aftur inn í myndverið.

„Jú, jú, þeir þurfa helst að gera það bara strax. Það er ekkert í húsi þeir fá ekkert fyrir það að vera á toppnum eftir þessa umferð. Ég myndi halda að fókusinn á næsta leik hæfist í síðasta lagi í fyrramálið,“ sagði Atli Viðar Björnsson, sérfræðingur Pepsi Max Stúkunnar.

„Hann náði stjórn á tilfinningum sínum fljótlega því byrjaði hann viðtalið á því að öskra. Réttilega. Þetta er leikur tilfinninga og þú verður að sýna tilfinningar þegar þú ferð í gegnum svona dramatík. Þú væri ómennskur ef þú myndir ekki sýna tilfinningar þá,“ sagði Reynir Leósson, sérfræðingur Pepsi Max Stúkunnar.

Það má sjá þetta tilfinningaríka viðtal og umræðuna í Stúkunni á eftir hér fyrir ofan.