Sport

Eggert Gunn­þór hafnar alfarið ásökunum um kynferðisbrot

Eiður Þór Árnason skrifar
Eggert Gunnþór Jónsson í leik með FH.
Eggert Gunnþór Jónsson í leik með FH. vísir/bára

Eggert Gunn­þór Jóns­son, leikmaður FH og fyrrverandi landsliðsmaður, hafnar því alfarið að hafa brotið kynferðislega á konu eftir landsleik Íslendinga í Danmörku árið 2010.

Þetta segir Eggert í yfirlýsingu sem Unnsteinn Elvarsson, lögmaður hans, sendir til fjölmiðla fyrir hans hönd. Stundin greindi frá því í dag að kæra hafi verið lögð fram á hend­ur leik­manninum og lands­liðs­fyr­ir­lið­an­um Aron Ein­ari Gunn­ars­syni í tengslum við málið. Aron Einar hefur sömuleiðis lýst sig saklausan af ásökununum.

Kona hefur sakað þá báða um að hafa brotið á sér eftir umræddan landsleik en Eggert Gunnþór hafði ekki áður verið nafngreindur opinberlega í fjölmiðlum. 

Hyggst óska eftir skýrslutöku

Í yfirlýsingu sinni segir Eggert það vera mikið áfall að vera ásakaður um ofbeldisbrot vegna atviks sem „var svo sannarlega ekki með þeim hætti sem lýst er í fjölmiðlum.“ Hann segist hafa óskað eftir því þann 1. október að vera boðaður í skýrslutöku hjá lögreglu til að skýra málið frá sinni hlið.

„Þar sem ég hef ekki enn fengið tækifæri til að skýra mál mitt á réttum vettvangi og sökum umfjöllunar fréttamiðla í dag tel ég mig hinsvegar ekki eiga annan kost en að stíga fram og lýsa því opinberlega yfir að ég er fullkomlega saklaus af því sem ég hef verið sakaður um,“ segir Eggert Gunnþór.

Aron þvertekur fyrir að hafa beitt ofbeldi

Aron Einar Gunnarsson landsliðsfyrirliði fordæmdi þá ákvörðun í lok september að hann yrði ekki í leikmannahópi liðsins fyrir komandi landsleiki. Kom fram í yfirlýsingu að hann teldi að KSÍ hafi sett hann til hliðar vegna „krafna sem byggist á óljósum orðrómi.“ 

Þó þvertók hann fyrir að beitt ofbeldi. Þá sagðist Aron ætla að óska eftir því við lögregluyfirvöld að fá að gefa skýrslu um þetta tiltekna kvöld. 

Ómar Smárason, deildarstjóri samskiptadeildar KSÍ, sagði í september að sambandinu hafi í byrjun júní borist ábending um að tveir landsliðsmenn væru sakaðir um hafa beitt konu kynferðislegu ofbeldi í landsliðsferð.

Átti atvikið að hafa átt sér stað eftir landsleik Danmerkur og Íslands í Kaupmannahöfn í september 2010. Guðni Bergsson, fyrrverandi formaður KSÍ, sagði þá að sambandið hafi heyrt af málinu þegar frásögnin komst í dreifingu á samfélagsmiðlum. Það hafi þá verið sett í ferli innan KSÍ.

Klara Bjartmarz, framkvæmdastjóri KSÍ, greindi frá því í samtali við RÚV þann 30. ágúst að KSÍ væri með tilkynningu um hópnauðgun til meðferðar. Klara sagðist hafa heyrt um hópnauðgunina í sumar.

Fréttin hefur verið uppfærð.

Yfirlýsing Eggerts Gunn­þórs Jóns­sonar í heild sinni:

Undanfarnar vikur hafa fjölmiðlar fjallað um atvik sem á að hafa átt sér stað í Kaupmannahöfn árið 2010 þar sem tveir landsliðsmenn hafa verið bornir þungum sökum. Ég er annar umræddra landsliðsmanna.

Það er hrikalegt áfall að vera ásakaður um hræðilegt ofbeldisbrot vegna atviks sem var svo sannarlega ekki með þeim hætti sem lýst er í fjölmiðlum.

Ég hef reynt að skýla mér og fjölskyldu minni fyrir kastljósi fjölmiðla þar sem ég hafði fram að birtingu fréttar Stundarinnar í dag ekki verið nafngreindur. Föstudaginn 1. október síðastliðinn hafði ég hinsvegar þegar óskað eftir því að vera boðaður í skýrslutöku til að skýra frá minni hlið.

Þar sem ég hef ekki enn fengið tækifæri til að skýra mál mitt á réttum vettvangi og sökum umfjöllunar fréttamiðla í dag tel ég mig hinsvegar ekki eiga annan kost en að stíga fram og lýsa því opinberlega yfir að ég er fullkomlega saklaus af því sem ég hef verið sakaður um.

Ég vona að málið komist í réttan farveg hið snarasta svo ég geti hreinsað mig af þessum ásökunum.

Eggert Gunnþór Jónsson.

Landsliðsmenn sakaðir um kynferðisofbeldi FH

Tengdar fréttir

Svona hljóðar ásökunin sem Aron Einar sver af sér

„Ég má segja frá, ég má bara ekki nafngreina. Mig langar ekki að burðast með þetta ein í hjartanu, mig langar ekki að hugsa í hvert skipti sem ég fer á meðal fólks: „Ætli þau viti þetta, ætli þau trúi mér“, því það er ógeðslega íþyngjandi og heftandi félagslega.

Mest lesið


Fleiri fréttir

Sjá meira


×

Mest lesið