Eriksen gæti snúið aftur til Ajax

Eriksen gæti í raun tæknilega spilað aftur á Ítalíu, en þá þurfa læknar hans að sanna að tímabundin veikindi eða vírus hafi valdið hjartastoppinu. Reglur frá árinu 2017 koma hins vegar í veg fyrir að hann spili þar í landi eins og er.

Í mörgum öðrum evrópskum deildum er þó leyfilegt að spila með gangráð líkt og var græddur í Eriksen, og samkvæmt ítalska miðlinum Il Corriere dello Sport hefur Daninn áhuga á að snúa aftur til Ajax þar sem hann hóf atvinnumannaferil sinn.

Eriksen yrði þá ekki eini leikmaður liðsins sem myndi leika með gangráð, en varnarmaðurinn Daley Blind leikur með liðinu. Hann fékk græddan í sig gangráð árið 2019.

Ef Eriksen yfirgefur Inter búast forsvarsmenn félagsins ekki við því að fá greitt fyrir leikmanninn. Það myndi þó spara þeim launakostnað sem er um sjö og hálf milljón evra á ári.

Samkvæmt heimildum ítalska miðilsins verða allar ákvarðanir sem ítalska félagið tekur  varðandi framtíð leikmannsins teknar í samráði við hann og hans fólk, en samband hans og félagsins er sagt vera mjög gott.