Hörður hlaut sekt vegna mannsins sem rekinn var af Hlíðarenda

Maðurinn var á meðal áhorfenda á leik Harðar og ungmennaliðs Vals, í Grill 66-deildinni, þar sem Hörður vann þriggja marka sigur, 29-26. Sýndi hann af sér ósæmilega framkomu í garð dómara og sjálfboðaliða með hrópum og köllum.

Orðaval á upptöku sýni að maðurinn hafi verið á vegum Harðar

Samkvæmt úrskurði aganefndar fær Hörður 25.000 króna sekt. Nefndin safnaði upplýsingum og nýtti meðal annars myndbandsupptöku af leiknum við sína ákvörðun. Í úrskurðinum segir:

„Af fyrirliggjandi gögnum málsins er ljóst að hlutaðeigandi aðili var á vegum handknattleiksdeildar Harðar, en orðaval hans á fyrrgreindri myndabandsupptöku rennir enn frekari stoðum undir það. Þó aðilum beri ekki saman um málsatvik, þá er hafið yfir vafa að mati aganefndar, að það orðfæri sem var viðhaft og lýst í skýrslu dómara, og heyrist að hluta til á fyrirliggjandi myndbandsupptöku, teljist vítaverð framkoma gagnvart starfsmönnum leiksins.“

Ragnar Heiðar Sigtryggsson, framkvæmdastjóri Harðar, sagði við Vísi eftir að aganefnd ákvað að taka málið fyrir að sér þætti „furðulegt“ ef að málið leiddi til refsingar fyrir félagið. Ekki hafi verið um forsvarsmann Harðar að ræða heldur stuðningsmann. Mat aganefndar er annað.

Ragnar sagði manninum hafa orðið heitt í hamsi í seinni hálfleik, meðal annars vegna þess að tónlist hefði verið spiluð á Hlíðarenda þegar leikurinn var í gangi, þegar leikmenn Harðar hófu sóknir sínar.

„Það var pínu hiti í mönnum þegar það var kvartað undan starfsmönnum hússins. Kannski hefðu menn mátt gera það öðruvísi en það var hiti og mikil spenna í leiknum,“ sagði Ragnar.