Innilit á æfingu á Jólagestum Björgvins

Örfáir miðar eru eftir á báða tónleikana en enn er hægt að kaupa miða á streymið annað kvöld. Forsöluverði á streymið lýkur kl.18 í dag. Þeir sem horfa í streymi geta haft lagalista og texta hjá sér og sungið með heima í stofu. 

Með Björgvini á tónleikunum koma meðal annars fram Eyþór Ingi, Gissur Páll, Högni Egils, Jóhanna Guðrún, Margrét Rán, Stefanía Svavars, Svala og Sverrir Bergmann. Síðustu 14 ár hefur Björgvin Halldórsson fært fólki jólin með stæl og boðið til sín skærustu söngstjörnum landsins til að töfra fram sannkallaða jólastemningu.

Sérstakur gestur tónleikanna er Krummi. Ásamt þeim koma fram Stórsveit Jólagesta undir stjórn Þóris Baldurssonar, strengjasveit undir stjórn Geirþrúðar Ásu Guðjónsdóttur, Reykjavík Gospel Company undir stjórn Óskars Einarssonar, Karlakórinn Fóstbræður undir stjórn Árna Harðarssonar, Barnakór Kársnesskóla undir stjórn Álfheiðar Björgvinsdóttur og dansarar úr Dansskóla Sigurðar Hákonarsonar.

Einnig koma fram sigurvegarar í Jólastjörnunni 2021 ásamt Jólastjörnunni Fríði París og sigurvegarar Jólalagakeppni Rásar 2, Heimilstónar. Ísleifur Þórhallsson framkvæmdastjóri Senu skipuleggur tónleikana. 

Mummi Lú ljósmyndari kíkti við á æfingu hjá þeim í vikunni.

Fleiri myndir má finna í myndaalbúminu hér fyrir neðan.