Gengst við því að hafa gert of mikið úr veikindum barna

Þrátt fyrir þetta segir hann heildarniðurstöðuna vera þá sömu, það er að COVID-19 geti verið alvarlegur sjúkdómur hjá börnum sem réttlæti bólusetningu.

Á seinustu dögum hafa komið fram athugasemdir við nýlegan pistil Þórólfs þar sem hann fjallaði um um alvarlegar afleiðingar COVID-19 hjá börnum og virkni bólusetninga. 

Í umtöluðum pistli, sem birtist á mánudag, kom meðal annars fram að spítalainnlagnir hjá börnum á aldrinum 5 til 11 ára væru um 0,6% af öllum smitum og vitnað í samantekt Sóttvarnastofnunar Evrópusambandsins. 

Beindist gagnrýnin meðal annars að því að Þórólfur hafi ekki tekið fram að sú tala miðaðist bara við greind börn sem sýndu einkenni en í sömu skýrslu Sóttvarnastofnunarinnar segir að um helmingur barna sem greinist sé einkennalaus. Var meðal annars vakið máls á þessu í færslu Frosta Sigurjónssonar, fyrrverandi þingmanns Framsóknarflokksins.

Hlutfallið sennilega lægra

„Eins og réttilega kemur fram í athugasemdunum þá var hlutfall spítalainnlagna 0,6% hjá þeim börnum sem voru með einkenni af völdum COVID-19 en einkennin voru ekki skilgreind nánar. Það er því rökrétt að álykta sem svo að hlutfallið sé sennilega lægra þegar miðað er við öll smit með eða án einkenna,“ segir Þórólfur í nýjasta pistli sínum sem birtist á Covid.is.

Hann heldur áfram og segir að þegar upplýsingar frá Bandaríkjunum, sem hann vitnaði sömuleiðis til, séu skoðaðar séu sjúkdómstilfelli ekki aðgreind eftir einkennum.

„Líklegt má því telja að fjöldi tilfellanna samanstandi bæði af börnum með einkenni og börnum án einkenna. Hlutfall spítalainnlagna í Bandaríkjunum er hins vegar svipað og greint er frá í uppgjöri Sóttvarnastofnunar Evrópu.“

Að sögn Þórólfs liggur ekki fyrir hvert hlutfall einkennalausra barna er á Íslandi og þá ber erlendum rannsóknum ekki saman um hlutfallið. Í áðurnefndri samantekt Sóttvarnastofnunar Evrópusambandsins sé vitnað í eina rannsókn þar sem talið sé að allt að 50% barna með COVID-19 geti verið einkennalaus. Í annarri nýlegri samantekt sé hins vegar talið að hlutfallið geti verið á bilinu 15 til 42%.

„Ef áætlað er að meðaltal úr bandarísku rannsóknunum sé nærri raunveruleikanum þá má álykta að einkenni sjáist hjá 70% barna sem smitast af COVID-19,“ segir sóttvarnalæknir.

Þrettán börn gæti lent á gjörgæsludeild

Ef gengið er út frá því hlutfalli og miðað við að öll 32 þúsund börn hér á landi á aldrinum 5 til 11 ára smitist af COVID-19 segir Þórólfur að innlagnir gæti orðið 134 (í stað 100 til 200 sem getið var um í fyrri pistli), 13 lagst inn á gjörgæsludeild (í stað 16 sem getið var um í pistlinum) og um eitt barn látist (í stað 1 til 2).

Sömuleiðis hafa verið gerðar athugasemdir við að fram hafi komið í fyrri pistli Þórólfs um virkni bólusetningar hjá börnum á aldrinum 5 til 11 ára að hún væri 90% gegn smiti.

„Eins og réttilega er bent á þá er virknin 90% gegn smiti hjá börnum með einkenni. Ávinningur af bólusetningunni er eftir sem áður ótvíræður,“ segir Þórólfur.