Íslandsmótið í fótbolta hefst um páskana

Gert er ráð fyrir því að á ársþingi KSÍ í febrúar verði samþykkt að lengja keppnistímabilið í efstu deild karla um fimm umferðir, þar sem tólf liða deildinni verður skipt upp í tvo hluta að loknum hinum hefðbundnu 22 umferðum.

Mótið hefst því snemma eða 18. apríl, á öðrum degi páska, og lýkur ekki fyrr en 29. október. Síðustu fimm umferðirnar, hin svokallaða úrslitakeppni, fara fram í október.

Sex vikna hlé vegna EM kvenna

Keppni í efstu deild kvenna, sem líkt og efsta deild karla hefur ekki fengið nafn fyrir nsætu leiktíð, hefst 26. apríl og lýkur 1. október. Gert er sex vikna hlé um mitt mót vegna Evrópumótsins í Englandi í júlí þar sem Ísland verður meðal þátttökuþjóða.

Þó að keppni í efstu deildum hefjist snemma þá er ráðgert að keppni í Mjólkurbikar karla hefjist enn fyrr, eða 8.-10. apríl. Fyrst verður þó leikið í Lengjubikarnum þar sem keppni hefst í febrúar.

Pepsi Max deildir karla og kvenna eru á Stöð 2 Sport. Deildirnar eru hluti af Stöð 2 Sport Ísland sem kostar 3.990 krónur á mánuði.