„Rosa­lega stór á­kvörðun að ætla að gera þetta ein“

„Mig hefur alltaf langað til þess að búa til podcast en ég ætlaði alltaf að fara tala um morð og svoleiðis af því ég er rosalega mikið inni í því en síðan bara eru alltof margir með þannig podcast hérna á Íslandi,“ segir Viktoría um það hvernig hugmyndin af hlaðvarpinu kviknaði.

Hún ákvað því að velja sér annað viðfangsefni og taka fyrir málefni einstæðra foreldra, enda fjölmargir í þeirri stöðu, hún sjálf þar á meðal.

Viktoría á hinn sjö mánaða gamla Óliver. Faðir Ólivers er ekki í myndinni en Viktoría hefur talað opinskátt um sína sögu við fylgjendur sína.

Hún var orðin sein á blæðingar þegar hún ákvað að taka óléttupróf og kom það henni í opna skjöldu þegar það reyndist vera jákvætt.

„Það fylgir þessu mikil drusluskömm“

„Það kemur rosalega dauf lína og fer að hágráta og hringi í pabba minn og ég vissi ekkert hvað ég ætti að gera og hann vildi náttúrlega ekki segja til hamingju, því hann vissi ekki hvar ég stæði með þetta. Ég hef náttúrlega farið í fóstureyðingu áður, þannig hann vissi ekki hvernig hann ætti að vera.“

Viktoría áttaði sig á því að það væru tveir menn sem kæmu til greina sem faðir barnsins. Hún hafði því samband við þá báða og lét þá vita hver staðan væri. 

„Það fylgir þessu svo mikil drusluskömm. Það bara má ekki lifa lífinu svona, þá ertu bara „drusla“. Ég þurfti að senda öðrum stráknum email af því hann var búinn að blokka mig. Hinn strákurinn vildi ekki tala við mig, þannig vinkona mín þurfti að senda á hann. Sá strákur sturlaðist og hinn mætti bara upp í vinnu til mín og var alveg stuðningsríkur fyrst og fór með mér í snemmsónar en síðan þegar ég var komin 12 vikur á leið lokaði hann bara á mig.“

Hringdi í eiginkonuna

Annar þessara manna reyndist vera giftur, en þegar hann var að hitta Viktoríu hafði hann talið henni trú um að hann væri að skilja við eiginkonu sína, sem reyndist síðan ekki vera satt. Þegar eiginkonan komst að því að Viktoría væri ólétt, hafði Viktoría samband við hana.

„Við töluðum alveg saman í klukkutíma og síðan tveimur vikum seinna sendir hún mér alveg hræðileg skilaboð þar sem hún segir að ég sé að ljúga og ég sé að reyna þvinga barninu mínu upp á hann. Hún var í rauninni að „slutshamea“ mig því ég vissi ekki hver pabbinn væri og ég væri bara að gera þetta til þess að reyna fá þennan karl til baka.“

Þó svo að Viktoríu hafi liðið líkamlega vel á meðgöngunni, segir hún þetta tímabil hafa tekið virkilega á sálina. Málið er ennþá í ferli og er Viktoría að bíða eftir því að komast með son sinn í blóðprufu til þess að komast að því hver faðirinn sé.

„Strákurinn minn er bara ótrúlega heppinn að eiga mig og þá sem eru á bak við mig og hann þarf engan annan.“

Lífið tók U-beygju til hins betra

Viktoría telur viðhorf sitt vera búið að hjálpa henni stórkostlega að komast í gegnum þennan tíma. Hún stundar hugleiðslu á hverjum einasta degi og hefur tileinkað sér daglegt þakklæti.

„Ég vil ekki leyfa barninu mínu að finna að mér líði illa eða ég að sé óhamingjusöm. Ég vil bara vera hamingjusöm mamma því þá verður barnið hamingjusamt.“

Viktoría segist vera á gjörólíkum stað í lífinu í dag, heldur en þegar hún varð ólétt.

„Ég var bara djammandi allar helgar og eiginlega drekkandi alla daga. Ég var í tveimur vinnum, var alltaf að vinna og alltaf að gera eitthvað. Þannig þetta var rosalega stór ákvörðun að ætla að gera þetta ein. Vinkonur mínar höfðu ekki trú á mér en studdu mig samt, en þær voru samt bara: Ertu alveg viss? Ég sneri lífinu mínu bara alveg við og í dag hrósa þær mér bara.“

„Ég tók þvílíka U-beygju með allt og er bara hamingjusamari í dag en ég var, þrátt fyrir allt þetta leiðindadót.“

Viktoría þakkar fyrir það að eiga gott bakland. Amma hennar hefur hjálpað henni mikið sem og besta vinkona hennar. Með aðstoð þeirra hefur henni tekist að halda úti hlaðvarpinu sínu, ásamt því að vera að gera neglur.

Samfélagsmiðlar bjóði upp á óraunhæfar fyrirmyndir

Þrátt fyrir mikinn stuðning segir hún það geta verið erfitt að vera ung móðir á tímum samfélagsmiðla. Á samfélagsmiðlum sýna flestir aðeins sínar bestu hliðar og því getur samanburðurinn orðið harkalegur.

„Þetta er bara það sem Instagram gerir, þetta sýnir þér einhverja glansmynd sem þú trúir og vilt verða og skammast þín af því þú ert ekki eins. Svo reynirðu að feta í spor þessarar manneskju sem er náttúrlega aldrei að fara virka af því þetta er bara glans, þetta er bara gervi.“

Viktoría segist sjálf hafa fallið í þessa gryfju. Sjálf átti hún það til að bera sig saman við Kardashian-systurnar sem allar halda óaðfinnanleg heimili og voru komnar með fyrirsætulíkama daginn eftir barnsburð.

Hún stofnaði því miðilinn Einstæð til þess að aðrir einstæðir foreldrar hefðu eitthvað raunhæft til þess að spegla sig í. Hægt er að nálgast hlaðvarpsþætti hennar hér og Instagram-síðu hennar hér.

Við einstæða foreldra hefur Viktoría þetta að segja:

„Verið þið, ekki vera að setja ykkur í einhver spor á einhverjum glansmyndum á samfélagsmiðlum og munið að taka tíma frá fyrir ykkur sjálf. Þið eruð nóg, það þarf ekki að vera fullkomið foreldri heldur bara hamingjusamt foreldri. Það er bara þannig að maður er alltaf að reyna sitt besta, ég trúi ekki öðru.“

Hér að neðan er hægt að hlusta á viðtalið við Viktoríu í heild sinni.