Fara betur saman en jarðarber og epli

Vinkonur tvær

Katla og Þórdís Björk sem eru í uppsetningu Ávaxtakörfunnar keppa báðar í Söngvakeppni Sjónvarpsins á laugardaginn og ríkir ekkert nema kærleikur á milli þeirra enda tvær glæsilegar ungar konur að gera flotta hluti. Það truflar þær ekki að þær séu báðar að sækjast eftir því að keppa á Ítalíu fyrir Íslands hönd í Eurovision og fara fögrum orðum um hvor aðra. Aðspurð hvernig það sé að æfa saman og vera svo að keppa í sömu keppninni er Þórdís ekki lengi að svara því.

„Það er best af því Katla er best! Hún er svo ógeðslega fyndin og klár og eins og alþjóð veit núna er hún líka alveg geggjuð söngkona!“

Rauða eplið og Mæja jarðarber ekki miklar vinkonur

Aðra sögu er að segja um Eplið og Mæju jarðarber sem þær leika á sviði í Ávaxtakörfunni en þær eru ekki miklar vinkonur annað en leikkonurnar sjálfar. Mæju jarðarberi kemur ekki vel saman við marga í byrjun söngleiksins svo það er ekki aðeins Eplið sem er grimmt við hana en Katla nýtur þess að leika hlutverkið.

„Þær eru svo ótrúlega leiðinlegar sko og það er svo gaman að fá að vera leiðinleg, sérstaklega í söngleik sem er svona cartoonish þá er maður svo ýkt leiðilegur.“

Segir Katla hlæjandi um Evu appelsínu og Eplið sem hún leikur.

Stór verkefni á sama tíma

„Við æfðum stanslaust í janúar og svo kom smá pása og þetta var svona fullkominn staður til að fá þessa pásu því þá kom hitt inn í staðin,“

segir Katla um hvernig það gangi að samtvinna bæði verkefnin. Hún segir skemmtilega stemningu vera í hópnum og að góður mórall einkenni æfingarnar. Söngkonurnar eru ekki þær einu sem eru í báðum verkefnunum. Kristinn Óli, betur þekktur sem Króli er einnig í Ávaxtakörfunni ásamt því að vera einn lagahöfunda lagsins Þaðan af sem Katla syngur í Söngvakeppninni.

Þórdís tekur í sama streng enda alvön því að halda mörgum boltum á lofti og segist fúnkera best við slíkar aðstæður. Ásamt því að setja upp söngleikinn og keppa í Söngvakeppninni með lagið Tökum af stað ásamt Reykjavíkurdætrum er hún einnig að sýna Skugga Svein með leikfélagi Akureyrar.

„Það hefur bara gengið vonum framar og ekki skemmir fyrir hvað það er gaman á báðum stöðum,“

segir hún um skipulagið.

Barnalán hjá leikurunum

Þórdís tók við hlutverkinu sem Mæja jarðarber af Maríu Ólafsdóttur sem á von á sínu fyrsta barni. Það eru ekki einu breytingarnar sem hafa verið gerðar frá upphafi en Jóhanna Guðrún átti upphaflega að leika Evu appelsínu en á nú von á sínu þriðja barni og tók Birna Pétursdóttir því við hlutverkinu.

Benedikt búálfur með í anda

Þórdís og Birna voru báðar í uppsetningunni á Benedikt Búálfi á Akureyri þar sem Þorvaldur Bjarni var einnig á bakvið grípandi tónlistina. Króli var líka í Benedikt búálfi og fór þar með hlutverk Tóta Tannálfs í þeim söngleik svo það er eflaust góð tenging á milli leikaranna.

„Það er næstum of gott til að vera satt! Leikhópurinn í Benedikt Búálfi var alveg einstakur svo það er mjög gott í hjartað að hafa Kidda minn og Birnu mína mér við hlið í áframhaldandi ævintýri.“

Segir Þórdís um áframhaldandi samstarfið hjá leikurunum.

„Það var algjör draumur að fá þetta hlutverk. Ég er mjög heppin að hafa fengið tvö hlutverk í sýningum þar sem Þorvaldur Bjarni semur tónlistina enda er hann einn mesti meistari sem ég hef unnið með. Ég er í fyrsta skipti að vinna með Góa og Chantelle en það hefur verið draumur hjá mér lengi. Það er alltaf mikil gjöf að fá að vinna með fagfólki og það er nóg af þeim í Ávaxtakörfunni.“ Segir Þórdís Björk um hópinn og upplifunina.

Ólust upp við Ávaxtakörfuna

Báðar þekktu leikkonurnar Ávaxtakörfuna vel úr æsku og höfðu mjög gaman af söngleiknum. 

„Ég horfði á öll leikrit sem ég komst í tæri við sem barn! Fór mikið í leikhús og vildi sjá allt hvort sem það var barnasýning eða þungar sýningar fyrir fullorðna! Ávaxtakarfan var því engin undantekning.“

Segir Þórdís og er augljóst að leikhúsáhuginn hefur vaknað snemma.

„Ég var næstum því farin að grenja þegar við vorum á æfingu og Eyþór Ingi var að syngja Immi best,“

bætir Katla við sem finnst súrrealískt að fá að taka þátt í söngleiknum sem hún ólst upp við. Hún lýsir ferlinu eins og að upplifa gamlan draum úr æsku og nýtur hverrar mínútu af upplifuninni. Henni finnst líka fyndin og falleg tilhugsun að þessi uppsetning af Ávaxtakörfunni sé að fara að fylgja nýrri kynslóð.