Sjáðu endurkomu Eriksen á Parken og markið sem fullkomnaði hana

Áhorfendur á vellinum stóðu upp og klöppuðu Eriksen lof í lófa þegar hann gekk inn á völlinn og víða í stúkunni mátti sjá borða og skilti þar sem hann var boðinn velkominn til baka.

Danir tóku á móti Serbum í vináttuleik kvöldsins og unnu öruggan 3-0 sigur. Christian Eriksen var í fyrsta skipti í byrjunarliði danska landsliðsins eftir atvikið, en hann bar einnig fyrirliðabandið í kvöld.

Joakim Mæhle skoraði fyrsta mark leiksins eftir um 15 mínútur og Jesper Linström tvöfaldaði forystu Dana snemma í síðari hálfleik.

Á 57. mínútu var svo komið að Eriksen þegar hann skoraði þriðja mark danska liðsins með góðu skoti fyrir utan teig við mikinn fögnuð áhorfenda.

Innkomu Eriksens, markið hans og hin mörk leiksins má sjá í spilaranum hér fyrir neðan.