Hleruðu rússneska hermenn ræða morð á íbúum Bucha

Eftir að hersveitir Rússa hörfuðu frá bænum fannst minnst ein fjöldagröf í bænum og lík fundust á víða á götum Bucha. Einhverjir hinna látnu voru með bundnar hendur og eru konur og börn á meðal þeirra.

Sagðist hafa skotið mann á hjóli

Rússar þvertaka fyrir að nokkur almennur borgarar hafi orðið fyrir skaða meðan bærinn var hernuminn en vísbendingar eins og myndefni og vitnisburður annarra íbúa fer alfarið gegn því. Gervihnattamyndir sýna til að mynda að lík sáust á götum Bucha einungis nokkrum dögum eftir að Rússar tóku bæinn og sýnir drónamyndband að rússneskir hermenn skutu ítrekað úr tveimur skriðdrekum á mann á hjóli.

Samkvæmt heimildum Spiegel má heyra á einni upptöku BND að rússneskur hermaður segist hafa skotið mann á hjóli. Á annarri heyrðist hermaður skipa öðrum að yfirheyra menn fyrst og skjóta þá svo.

Málaliðar komu að ódæðunum

Þá benda upplýsingar BND til þess að málaliðar Wagner Group hafi verið viðstaddir og mögulega framið ódæðin í Bucha.

Þeim hópi, sem talinn er í eigu auðjöfursins Yevgeny Prigozhin sem er með náin tengsl við Vladimír Pútín, forseta Rússlands, hefur á undanförnum árum verið lýst sem skuggaher Rússlands og hafa málaliðar Wagner Group verið virkir í Mið-Austurlöndum og Afríku.

Evrópusambandið segir Wagner Group hafa verið stofnað af Dmitry Utkin, fyrrverandi hermanni frá Rússlandi, sem er skreyttur nasista-húðflúrum og hefur verið myndaður við hlið Pútíns. Þá er málaliðahópurinn sagður vera kallaður Wagner Group vegna þess að Richard Wagner hafi verið eitt af uppháhalds tónskáldum Adolfs Hitler.

Utkin er meðal annars sakaður um að hafa fyrirskipað pyntingu og morð á sýrlenskum liðhlaupa.

Vitni í Bucha segja að upphaflega hafi ungir hermenn hernumið bæinn en seinna meir hafi eldri menn mætt á svæðið og árásum á borgara hafi fjölgað í kjölfarið.

Morð mögulega daglegt brauð

Heimildarmenn Spiegel segja upptökur BND gefa til kynna að morð á almennum borgurum eigi sér reglulega stað hjá rússneskum hermönnum. Þeir tali um slík morð eins og þau séu daglegur hluti af lífum þeirra og er talið að þau séu jafnvel liður í innrásaráætlunum Rússa og ætlað að hræða Úkraínumenn og draga úr baráttuvilja þeirra.

Aðrar upptökur sem verið er að greina eru sagðar gefa til kynna að sambærileg ódæði hafi verið framin víðar og þá sérstaklega í og við Maríupól, sem Rússar hafa setið um frá því í upphafi innrásarinnar.