Danir opnir fyrir því að hýsa landsleiki Íslands

Lítið virðist þokast áfram hjá stjórnvöldum í ákvarðanatöku um, og hvað þá byggingu, nýrrar þjóðarhallar. 

Því vofir yfir ótti um að Íslendingar verði skikkaðir að spila heimaleiki erlendis, líkt og Færeyingar neyddust til að gera í undankeppni EM karla í handbolta 2020, þegar þeir spiluðu heimaleiki í Danmörku.

Á meðal þeirra sem hafa gagnrýnt stöðuna er Guðmundur Guðmundsson landsliðsþjálfari karla sem sagði móðgandi hvernig stjórnvöld kæmu fram við íslenska landsliðið. Fjallað var um þau ummæli í dönskum fjölmiðlum.

Vísir sendi danska handknattleikssambandinu fyrirspurn um það hvort það kæmi til greina að hýsa landsleiki Íslands í Danmörku, og hvað það kæmi til með að kosta.

Morten Stig Christensen, formaður danska sambandsins, svaraði og sagði að ekki hefði komið nein formleg beiðni frá HSÍ. Á meðan að aðeins væri um vangaveltur að ræða vildi hann því lítið tjá sig.

„En almennt séð erum við alltaf jákvæð varðandi það að styðja við systursambönd okkar á Norðurlöndum eins og við best getum og við vitum að það er gagnkvæmt,“ sagði Christensen.

Ísland hefur um árabil verið með undanþágu hjá evrópska handknattleikssambandinu til að spila landsleiki á Íslandi þar sem að hér er engin handboltahöll sem uppfyllir ýmsar kröfur sambandsins varðandi leiki á hæsta stigi, svo sem varðandi öryggi leikmanna, aðstöðu áhorfenda og fjölmiðla, og fleira.

Ísland fékk svo raunar undanþágu ofan á þá undanþágu til að spila landsleiki á Ásvöllum vegna lokunar Laugardalshallar. Gólfið í Laugardalshöll eyðilagðist vegna vatnsskemmda í nóvember 2020 en vonir standa til þess að hægt verði að spila þar þegar strákarnir okkar hefja undankeppni EM í október. Þannig mætti koma fyrir fleiri áhorfendum en á Ásvöllum, þar sem eftirspurn eftir miðum var mun meiri en framboðið í leiknum gegn Austurríki fyrr í þessum mánuði.

Enn góður vilji hjá EHF en aðdragandinn yrði lítill

„Okkur er mikið í mun að fá áfram heimild til að spila heimaleikina okkar á Íslandi því það skiptir okkur, og við viljum meina land og þjóð, gríðarlegu máli,“ segir Róbert Geir Gíslason, framkvæmdastjóri HSÍ, og bendir á að það yrði ekki bara „skelfilegt“ fyrir íslenska þjóð að þurfa að spila heimaleiki erlendis heldur afar kostnaðarsamt fyrir HSÍ.

„Við höfum því aðallega leitað til EHF eftir góðum vilja til að leyfa okkur að spila áfram í Laugardalshöll, eða eftir atvikum á Ásvöllum, og þær viðræður hafa hingað til gengið ágætlega. Á endanum, ef ekkert gerist, verður okkur samt hent út og það yrði væntanlega gert með litlum aðdraganda, eins og hjá Færeyingum,“ segir Róbert og bætir við:

„Með hverri undankeppni Evrópumóts eru kröfurnar varðandi aðstöðu að aukast og þær aukast enn fyrir næstu undankeppni, EM 2024. Því lengur sem við bíðum, og því minni svör sem við getum veitt um framgang mála, því meiri hætta er á að við lendum einhvern tímann á leiðarenda. Við eigum að sleppa fyrir EM 2024 – 7, 9, 13 – en höfum svo sem ekki tekið umræðuna um hvað yrði ef Laugardalshöll klikkar. En ramminn okkar þrengist og þolinmæðin minnkar sífellt.“