Átján stigum frá því að taka stigametið af leikmanni sem er í hinu liðinu

Aliyah Collier hefur skilað ótrúlegum tölum í úrslitaeinvíginu á móti Haukum en 27 stig og 20 fráköst dugðu Njarðvík ekki til að tryggja sér Íslandsmeistaratitilinn og því verður hreinn úrslitaleikur á Ásvöllum á sunnudaginn.

Collier hefur verið með tröllatvennu (yfir 20 stig og 20 fráköst) í þremur af fjórum leikjum og varð sú fyrsta til að ná 30-20 leik í lokaúrslitum kvenna.

Hún er alls með 117 stig og 73 fráköst í fyrstu fjórum leikjunum og tvö met eru því í stórhættu í lokaleik tímabilsins.

Collier vantar nú aðeins átján stig til að slá stigametið og sjö fráköst til að slá frákastametið í úrslitaeinvígi kvenna en hún hefur verið langt yfir þessum tölum í leikjunum til þessa.

Stigametið á einmitt leikmaður í hinu liðinu en það er Haiden Palmer. Haiden skoraði 134 stig þegar Snæfell varð Íslandsmeistari vorið 2016 eftir sigur á Haukum í oddaleik.

Collier er komin upp í þriðja sætið á listanum á eftir þeim Palmer og Aalyah Whiteside sem lék með Val vorið 2018.

Frákastametið er í eigu Tierny Jenkins sem tók 79 fráköst í aðeins fjórum leikjum með Haukum vorið 2012. Njarðvíkngurinn LeLe Hardy var með 77 fráköst í sama einvígi og þar var því um mikið frákastaeinvígi að ræða. Collier er þegar komin upp í þriðja sætið á listanum.