„Ég syng í baðinu, syng í sturtunni. Á ég líka að syngja í 60 Minu­tes?“

Jon Wertheim, fréttamaður 60 Minutes, var staddur hér á landi í mars, á úrslitakeppni Söngvakeppninnar þar sem atriði Íslands í Eurovision þetta árið var valið.

Fréttastofa ræddi við Wertheim í mars þar hann greindi frá því að næstum óeðlilegur áhugi Íslendinga á keppninni hafi leitt tökuliðið hingað til lands, til að fjalla um Eurovision.

Í viðtali við fréttastofu nefndi Wertheim sérstaklega að það hefði komið honum á óvart að forseti landsins væri svo viljugur að ræða fyrirbæri eins og Eurovision við erlenda fréttamenn.

Það kemur því ef til vill ekki á óvart að Guðni er nokkuð fyrirferðarmikill í innslagi 60 mínútna, þar sem hann tók meðal annars lagið. Farið er stuttlega yfir sögu Íslands í Eurovision-keppninni og rifjað upp hvernig íslenska þjóðin var á því að Gleðibankinn myndi fara með sigur af hólmi í keppninni 1986, þeirri fyrstu sem Ísland tók þátt í.

„Ég man þetta eins og það hafi gerst í gær,“ sagði Guðni við Wertheim í þættinum. „Ha! núll stig til Íslands hugsaði maður. Við enduðum í sextánda sæti. Þetta var raunveruleikatékk fyrir okkur Íslendinga.“

Eins og Íslendingar þekkja hefur íslenskt atriðið ekki unnið keppnina hingað til, og segir Wortheim að vonbrigði séu þema sem Íslendingar kannist við þegar kemur að Eurovision.

„Við höfum aldrei unnið þetta, eins og þú veist. Tvisvar verið nálægt því, tvisvar í öðru sæti,“ sagði Guðni sem kom fréttamanni 60 Minutes á óvart með þekkingu sinni á keppninni.

„Ég man auðveldlega eftir sigurlögunum. Sanda kim árið 86, Brotherhood of Man, Save Your Kisses for Me árið 76, ef ég man rétt.“

Þú veist að það væru afglöp í starfi af minni hálfu ef ég myndi ekki biðja þig um að syngja?

„Ég syng í baðinu,  syng í sturtunni. Á ég líka að syngja í 60 Minutes?“

Sem er nákvæmlega það sem hann gerði, lagstúf úr Save Your Kisses for Me sem bar sigur úr bítum fyrir hönd Bretlands í keppninni árið 1976.

Í þættinum er farið um víðan völl. Rætt er við kynna Söngvakeppninnar, Reykjavíkurdætur, Systurnar sem keppa fyrir Íslands hönd í Ítalíu eftir um tvær vikur og svona mætti áfram telja. Guðni átti þó lokaorðið í þættinum.

„Við erum að koma undan faraldrinum. Það er stríð í Evrópu. Hver hefði trúað því. Eurovision er skemmtun. Keppnin skiptir engu máli í stóra samhenginu. En ef maður hugsar alltaf svoleiðis, ef maður skemmtir sér aldrei, þá stefnum við til glötunar.“

Lesa má umfjöllun 60 Minutes hér en í innslaginu hér fyrir neðan má sjá Wortheim ræða um innslagið sjálft. Íslenskir áhorfendur geta séð þáttinn í heild sinni á sunnudaginn næsta þegar hann verður á dagskrá Stöðvar 2.