Í bann hjá KSÍ í sex mánuði vegna fölsunar

Þetta er niðurstaða aga- og úrskurðarnefndar KSÍ sem birt var í gær.

Knattspyrnudeild ÍR kærði Víkinga fyrir að nota ólöglegan leikmann þegar liðin mættust 26. mars í B-deild Lengjubikars karla.

Víkingar viðurkenndu brot sitt en sögðust hafa fengið samþykki ÍR-inga fyrir fram fyrir því að ekki yrðu gerðar athugasemdir við það, þar sem að úrslit leiksins hefðu ekki haft nein teljandi áhrif á keppnina.

Skoraði í leiknum

Um var að ræða erlendan leikmann, sem ekki er nefndur á nafn í kærunni, sem ekki var kominn með íslenska kennitölu en lék í treyju númer 11 í leiknum. Kristófer Daði Kristjánsson var skráður með það númer á leikskýrslu en tók engan þátt í leiknum.

Vildu Víkingar, sem leika undir stjórn fyrrverandi landsliðsþjálfarans Guðjóns Þórðarsonar, að erlendi leikmaðurinn næði að spila með liðinu áður en að tímabilið hæfist í 2. deild. Leikmaðurinn gerði það og skoraði í 2-1 sigri Víkinga í leiknum. ÍR-ingum hefur hins vegar nú verið úrskurðaður 3-0 sigur.

Þar að auki hlaut fyrrnefndur Kristján Björn refsingu. Hann var skráður í liðsstjórn Víkings í leiknum og álitinn bera ábyrgð á fölsun leikskýrslunnar enda kvittaði hann undir skýrsluna.

Svipað atvik kom upp í mars þegar Haukar fölsuðu leikskýrslu fyrir leik gegn ÍH en þá var stjórnarmaður Hauka úrskurðaður í sex mánaða bann frá stjórnunarstörfum.

Þar sem að Kristján Björn er ekki í stjórn Víkings var hann ekki úrskurðaður í bann frá stjórnunarstörfum heldur í sex mánaða keppnisbann.

Hin breyttu úrslit þýða að ÍR vann alla leiki sína í 1. riðli B-deildar Lengjubikarsins og endaði með 15 stig en með því að vera úrskurðað tap endaði Víkingur í 6. og neðsta sæti með 4 stig. Úrslitin breyta því ekki að ÍR komst í úrslitaleik B-deildarinnar en tapaði þar fyrir Njarðvík eftir vítaspyrnukeppni.