Elliði skoraði fjögur í öruggum sigri | Íslendingalið Aue fallið um deild

Gummersbach hefur nú þegar tryggt sér efsta sæti þýsku B-deildarinnar nú þegar tvær umferðir eru eftir af tímabilinu. Undir stjórn Guðjóns Vals Sigurðssonar hefur liðið unni 29 leiki á tímabilinu og tapað sjö.

Elliði Snær Viðarsson var drjúgur í sigri liðsins í kvöld, en hann skoraði fjögur mörk úr fimm skotum þegar liðið vann sex marka sigur gegn Rimpar, 29-23. Hákon Daði Styrmisson var hins vegar ekki með Gummersbach vegna meiðsla.

Á hinum enda töflunnar var Íslendindingalið Aue að berjast fyrir lífi sínu í deildinni. Liðið heimsótti Dormagen í kvöld, en Dormagen er einnig í fallbaráttu.

Aue þurfti á sigri að halda til að eiga enn möguleika á að halda sæti sínu í deildinni, en sjö marka tap þýðir að liðið er fallið um deild.

Arnar Birkir Hálfdánarson komst ekki á blað fyrir Aue og þá kom Sveinbjörn Pétursson ekki við sögu hjá liðinu. Færeyingurinn og fyrrum KA-maðurinn Áki Egilsnes var hins vegar drjúgur fyrir Aue í kvöld og skoraði fjögur mörk.