Varnarmálaráðherrar í Reykjavík: Samstíga um að Úkraína verði að vinna stríðið

Tveggja daga fundi varnarmálaráðherra Norðurlandanna, Eystrasaltsríkjanna, Bretlands, Þýskalands, Hollands og Póllands og í nokkrum tilfellum staðgenglar þeirra lauk í Reykjavík í dag. Þórdís Kolbrún R. Gylfadóttir utanríkisráðherra segir innrás Rússa í Úkraínu hafa verið aðalumræðuefnið ásamt öðrum varnarmálum sem og undirbúningur fyrir leiðtogafund NATO í Madrid í lok þessa mánaðar.

„Og okkar hlutverk í næstu skrefum. Þetta verður erfiður tími framundan. Það skiptir öllu máli að gera það sem er rétt í þeirri stöðu,“ segir Þórdís Kolbrún. Því miður væru engin merki þess að stríðinu í Úkraínu væri að ljúka.

„Það kann að vera að það myndist einhver þreyta ýmist hjá ákveðnum ríkjum, leiðtogum eða almenningi á einhverjum svæðum. En mér finnst algert lykilatriði að halda því til haga að það er Úkraína sem þarf að vinna stríðið og það er úkraínska þjóðin sem tekur ákvarðanir um næstu skref. Það er ekki annarra landa eða annarra afla að ákveða það,“ segir utanríkisráðherra.

Þrátt fyrir blæbrigði í málflutningi sagði Ben Wallace varnarmálaráðherra Bretlands vestræn ríki samstíga í þeirri afstöðu að Putin yrði að tapa stríðinu í Úkraínu.

„Mér líður ágætlega með og er rólegur yfir að Macron Frakklandsforseti tali við Putin. Einhver verður að hringja til Putins og segja honum að hann sé að tapa. Það hjálpar engum að halda ekki uppi einhverjum samskiptum,“ segir Wallace.

Artis Pabriks varnarmálaráðherra Lettlands hefur verið einn einörðustu talsmanna þess að Rússum verði mætt af hörku. Enda þekkja Eystrasaltsríkin það af eigin raun að vera innlimuð af Rússum og þekkja þá einna best sem nágranna. Hann segir Putin hafa misreiknað sig varðandi samstöðu Vesturlanda.

„En frá sjónarhóli Eystrasaltsríkjanna, sjónarhóli Lettlands, óskum við þess að sjálfsögðu að ríki myndu bregðast hraðar við og með meiri stuðningi við Úkraínu," segir Pabriks.

Þjáningar Úkraínumanna aukist með hverjum deginum sem líði. Vesturlönd ættu að búa sig undir langtíma efnahagsáhrif vegna stríðsins sem gæti dregist á langinn. Vestrænir leiðtogar ættu ekki að hafa áhyggjur af sálarástandi Putins sem enginn þekkti hvort sem er og að ekki mætti niðurlægja hann.

„Við verðum einfaldlega að sinna hlutverki okkar og það er einfalt. Við verðum að stöðva þessa árás og koma Rússum út úr Úkraínu. Þetta er það eina sem við ættum að hafa áhyggjur af,“ segir Pabriks.

Putin væri meistari í undirróðri og Vesturlönd ættu að varast falsfréttir hans og fagurgala.

„Varast mýkra vald hins rússneska alræðis sem er að hafa áhrif á þjóðfélög okkar. Sem fær okkur til að hugsa að kannski komi ekkert illt fyrir okkur ef við gerum málamiðlanir um eitthvað. Mesti vandi okkar í Eystrasaltsríkjunum er að venjulega bitna slíkar málamiðlanir ekki á ríkjum sem eru lengra í burtu heldur á okkur," segir Pabriks.

Hann hefði ekki miklar áhyggjur af stöðu Eystrasaltsríkjanna á þessari stundu þegar Rússar væru að tapa stríðinu. Ef þeir ynnu stríðið hins vegar eða ef samið yrði við þá um einhverja landvinninga yrði staðan önnur fyrir nágrannaríki Rússa.

Viðtalið við Artis Pabriks í heild má sjá á spilaranum hér fyrir neðan.